Kudutshulwe umhleli womcimbi wafa
UQHUBEKE sekumuncu umcimbi wengoma eSigqubeni, KwaSwayimane, ngoMgqibelo, emuva kokuba kudutshulwe ilungu lomndeni ebeliwuhlelile.
Bekungakaboshwa muntu ngokufa koMnuz Funinkosi Gumede (51) okuthiwa udutshulwe esemotweni emela abanye abebecela ukugitsheliswa.
Abantu ababili abehamba nabo, okukhona kubo nomshana wakhe uThabiso Ndlovu (15), basindile.
Okhulumela umndeni, uMnuz Bongani Gumede, uthe bebehlele idili lengoma eliqale ngawo uMgqibelo lizophela ngeSonto. Ngenxa yokuthi bekulindeke abalandeli abaningi bengoma, uthe bacele amaphoyisa esiteshini saseMsunduzi ukuthi azoqapha isimo.
“Umcimbi wawuhlela ngonyaka odlule, sihlelela ukuthi sizijabulise nabathandi bengoma ngePhasika. Safaka isicelo emaphoyiseni ukuthi abe khona kuze kuphele umcimbi ngeSonto. NgoMgqibelo awafikanga waze waphela umcimbi. Kuthe noma sishaya ucingo esiteshini sangasizakala,” kusho uGumede.
Uthe ntambama umufi ubesehambisa unina ngabo 6 ntambama, ehamba nomshana wakhe nomakhelwane.
Uthe sebebuyela ekhaya ebusuku ngo-9 umufi wabona kukhona abebecela ukugitsheliswa endleleni wabamela.
“Kuthe esemile kwavumbuka izigebengu ezingaziwa, zadubula. Umshana ulimele walashwa emtholampilo wadedelwa. Umakhelwane uJongosi Mkhize akalimalanga nalabo abebecele ukugitsheliswa basindile,” kusho uGumede.
Kuthiwa umufi ushonele khona emotweni, umshana wakhe uselulamela ekhaya.
Uthe noma umcimbi uqhubekile ngeSonto isimo sesimuncu kodwa umndeni ubungasekho.
UGumede uthe bakhathazekile ngoba kuyabaphinda lokhu okwenzekile. NgoSepthemba ngonyaka odlule kwadutshulwa amalungu omndeni amathathu, amabili afela khona lapho. Elinye lashona kamumva. UGumede uveze ukuthi nakuleso sehlakalo kwagcina kungaboshwanga muntu. Mayelana nokwangempelasonto uthe abazi ukuthi kumayelana nani ukuhlaselwa komndeni.
Kushaye isikhathi sokushicilela amaphoyisa engakatholakali ngemininingwane ngalolu daba.