UMboweni uphika eyokuqokwa kukaRamos
UNGQONGQOSHE wezeziMali, uMnuz Tito Mboweni, ukuphikile ukuthi kukhona oseqokelwe esikhundleni sokuhlukanisa i-Eskom izigaba ezintathu.
Emibikweni yamaphephandaba angeSonto kuthiwe isikhulu se-Absa esizophuma esikhundleni, uNksz Maria Ramos, “uqokelwe” lo msebenzi.
Ekhuluma nabezindaba, uMboweni uthe bekungakaqokwa muntu.
NgoMashi i-Eskom yathi yehluleka wukuthola uR7 billion eyayikade iwuboleke kwiChina Development Bank.
Kuvele ukuthi uhulumeni uxhase i-Eskom ngoR5 billion njengoba idinga uR17 billion.
Isazi somnotho esizimele, uMnuz Khaya Sithole, sithe kuzoba nenkinga uma kufakwa uNksz Ramos uma kubhekwa indlela isikhulu esiphezulu se-Eskom uMnuz Phakami Hadebe esahamba ngayo e-Absa.
Sithe asiboni ukuthi kuzoba nokusebenzisana okuhle phakathi
kukaNksz Ramos noHadebe.
UNksz Natasha Mazzone, weDA uthe babonile ukuthi uMboweni uxhase i-Eskom ngoR5 billion.
“Kuyacaca ukuthi izinkinga zemali e-Eskom zisaqhubeka. Kuyishwa ukuthi abakhokhi bentela balokhu bephose imali yabo emgodini ongagcwali owu-Eskom. Abantu bayadinga ukutshelwa iqiniso ngesimo se-Eskom ngoba kuyacaca ukuthi ayikho imali enkampanini kodwa uhulumeni ulokhu eyixhasa ukuze ugesi unganqanyulwa njengoba kuyiwa okhethweni,” kusho uNksz Mazzone.
UNobhala Jikelele weNational Union of Metalworkers of South Africa (Numsa), uMnuz Irvin Jim, uthe kabahambisani nohlelo lokuhlakazwa kwe-Eskom ngoba kuzoqeda imisebenzi yamalungu abo.
Uthe uma kuqokwa uNksz Ramos kusho ukuthi i-Eskom izodayiselwa abamhlophe abangeke bacabangele abantu abamnyama.
“Izinkampani zikahulumeni kufanele zilawulwe nguye ngoba uma kufakwa oNksz Ramos bazojaha inzuzo.”