‘Izinsolo ngoMalema ngeke ziyilimaze i-EFF okhethweni’
UMHLAZIYI wepolitiki ozimele, uMnuz Thabani Khumalo, uthi izinsolo zakamuva zokuthi umholi we-EFF uMnuz Julius Malema udla imali, ngeke zibe nomthelela omubi njengoba kuyiwa okhethweni ngenyanga ezayo.
UKhumalo usho lokhu emuva kokuthi elinye ilungu le-EFF, uMnuz Zolile Xalisa, lisole uMalema ngokudla imali yeqembu nokulenza into yakhe.
UXalisa wenze lezi zinsolo encwadini yakhe ebingamakhasi amathathu ayithumelele i-EFF ngesonto eledlule.
Uveze ukuthi kunemali eqoqwa kumalungu e-EFF asePhalamende, akwiziShayamthetho bese leyo mali yenza amaphathi emuva kwemihlangano yobuholi obuphezulu beqembu.
“Izinsolo ezenziwe wuXalisa noRawula (Thembinkosi) zokuthi uMalema udla imali yeqembu nokuthi uliphethe kabi ngeke ziwenze umonakalo njengoba kuyiwa okhethweni ngoba kungenzeka ukuthi bakhulunyiswa yinhliziyo ebuhlungu emuva kokubona ukuthi abangenanga ohlwini lwamalungu aya ePhalamende. Uma zineqiniso lezi zinsolo ziyangabazeka ngenxa yesikhathi ezenziwa ngaso. Ngakho akulula ukuthi abantu bazikholwe,” kusho uKhumalo.
Uthe i-EFF izothola amavoti amaningi nakulokhu futhi uyibona iwudlula u-6% mhlawumbe iye lapha ku-8% kodwa ngeke ithole amavoti enele okuphatha izwe.
Isolezwe lithole ukuthi uXalisa ushiye i-EFF wayongena kwi-African Transformation Movement (ATM).
Umkhulumeli we-EFF kuzwelonke, uDkt Mbuyiseni Ndlozi, uthe alikho iqiniso kokukhulunywa wuXalisa kodwa wenza lezi zinsolo ngoba engangenanga ohlwini oluya ePhalamende.
“Amagatsha e-EFF awamphakamisanga yingakho engangenanga ohlwini lwamalungu aya ePhalamende. Usengena ohlwini lwabantu abathanda izikhundla abavele baqambe amanga nge-EFF uma bengaqokwanga amagatsha,” kusho uNdlozi. Khonamanjalo uMnuz Jacob Lebogo uqembulekele kwi-EFF esuka kwi-ANC.
ULebogo ungomunye wabaholi be-ANCYL ababeseka uMalema ngesikhathi enezinkinga ezaholela ekutheni agcine esexoshiwe kwi-ANC ngo-2012.