Sekubenele abashiswa ‘yisoka’
KUBENELE abathathu abangqongqiswa nendlu belele KwaDesai ngaKwaNdengezi ngoLwesithathu, ngeledlule.
UNksz Sibongile Mkhwanazi, uNksz Zodwa Nkhwanazi, noMnuz Khanyisani Mpanza bagcine beshonele esibhedlela ngemuva kokusha nendlu.
Kusolwa uyise wengane kaNksz Mkhwanazi (Zodwa), osagcwele
amathafa ngalesi sehlo.
Kuvele ukuthi indodakazi kaZodwa eneminyaka eyisihlanu isesimeni esibucayi esibhedlela yize kwase kubikwe ukuthi ishonile. Kuvele nokuthi uNksz Mkhwanazi (Sibongile) ushone nengane yakhe abeyikhulelwe.
Kuthiwa laba bashiswa ngemuva kwengxabano phakathi kukaZodwa nesoka lakhe.
Umfowabo wezelamani zakwaMkhwanazi, uMnuz Jabulani Mkhwanazi, uthe ushaqekile ngokushona kodadewabo.
“Kunzima kakhulu kuleli khaya njengamanje ngoba asazi nokuthi sizothathani sihlanganise nani,” kusho uMkhwanazi.
Uphinde waqinisekisa ukuthi odadewabo nosibali wakhe, uMpanza abashone ngemuva kwalesi sigameko.
“Empeleni umshana usimeni esibucayi egunjini labagula kakhulu esibhedlela,” kuqhuba uMkhwanazi.
Isolezwe lifika endaweni yesigameko kwakunephunga likaphethroli emnyango wegumbi okwakwenzeke kulo lesi sigameko.
Owakulo muzi, uNksz Sizakele Ndlovu, wathi abashonile babelimele kakhulu bengabonakali ngisho ukuthi bangobani ngenkathi bephuma engunjini elalisha.
“Into engayibona ngenkathi kuvuleka umnyango inyantisa igazi. Babebucuke izikhumba bengakwazi nokuhamba, begaqa ngamadolo baze bafika emnyango balala phansi bekhala ngokushiselwa,” kusho uNksz Ndlovu. Okhulumela amaphoyisa KwaZulu-Natal, uCol Thembeka Mbele, uthe amaphoyisa aphansi phezulu, athungatha umsolwa.
“Amaphoyisa aphenya amacala amathathu okubulala nelilodwa lokuzama ukubulala,” kusho uCol Mbele.