Impelasonto yePhasika ibe muncu emakholweni
NGEPHASIKA kuvame ukuthi kubatshazwe isibalo sabantu abashona ezingozini zomgwaqo eNingizimu Afrika ngoba njengesikhathi samaholidi kaKhisimuzi siba phezulu isibalo sezingozi yingakho isandla samaphoyisa siqina kakhulu ngalesi sikhathi emgwaqweni.
Kodwa leli Phasika lidlula nje izwe nomhlaba lisathuthumela ngenxa yezigameko ezingavamile ezidlule nemiphefumulo yenqwaba yabantu.
Lapha eNingizimu Afrika kushone abangu-13 ebandleni iPentecostal Holiness Church, eDlangubo, ngoLwesine ebusuku ngesikhathi kubhidlika uphahla lwesonto abazalwane belele.
Bangaphezudlwana kwabangu-20 abalimalile baphuthunyiswa esibhedlela esiseduzane. Kuthiwa uphahla lubhidlizwe wukuhlasela kwemvula enamandla ebilokhu iyishaye njalo phesheya koThukela.
Le nhlekelele iphoqe ukuthi abazalwane baleli bandla bangabe besaqhubeka nezinkonzo zePhasika, bagodukiswa.
Kuthe izwe lisakhungethwe yilesi sehlo, ngeSonto lwePhasika okuwusuku amaKristu asuke ekhumbula ngalo ukuvuka kukaJesu, kwavela ukuthi kuhlaselwe ngamabhomu kanyekanye amasonto amathathu namahhotela omntakabani amahlanu eSri Lanka.
Izolo isibalo sabantu obesekuqinisekisiwe ukuthi bashonile kulesi sibhicongo besimi ku-290 kanti abalimele bebengaphezu kuka-500.
Nakuba lingekho iqembu labashokobezi ebeseliveze ukuthi yilona elihlasele kodwa bese kukhona abangu-24 ababoshiwe.
Lezi zigameko zisho ukuthi impelasonto yePhasika ibe ngemuncu kakhulu emakholweni.
Inhlekelele yaseDlangubo isisukunyelwe wuhulumeni wesifundazwe KwaZulu-Natal nokuyinto encomekayo ngoba sithemba ukuthi uphenyo luzojula futhi lusheshe luveze ukuthi imbangela kube yiyona ngempela imvula noma kukhona okunye okudinga ukulungiswa.
Into emqoka ukuthi kuhlale obala konke ukuze isibhicongo esifana nalesi singaphinde senzeke.
Imindeni nezihlobo zabo bonke abashonile kulezi zinhlekelele engathi ingaduduzeka ngalesi sikhathi esinzima esesizokwenza njalo isikhathi sePhasika sibakhumbuze ubuhlungu.