Nakekela isitho sangasese ngendlela
KUNINGI okungadala ukuthikamezeka kwesitho sangasese kwabesifazane uma singanakekelwa ngendlela efanele. Ukuncinza, ukulunywa nokushisa komchamo, ezinye zezinkinga ezijwayele ukuhlasela abesifazane esithweni sangasese. Kuthiwa ngokwemvelo lena yindawo ezwelayo, okumele inakekelwe.
Inkampani yemikhiqizo yabesifazane iLiv Feminine Care, inikeza amathiphu kwabesifazane. Isitatimende esikhiphile sithi abesifazane bayazinaka isikhumba, bazivocavoce kodwa abajwayele ukunakekela isitho sangasese. Bathi ukuzinakekela kungagwema nezifo ezitholakala ngokuya ocansini nezihlobene nomchamo. Bagcizelela nokuthi ezinye izinkinga zingadala nephunga elibi esithweni sangasese uma singanakwa. NgokweLiv Feminine Care, insipho akumele isetshenziswe ukugeza isitho sangasese. Kuthiwa insipho noma ngabe iyiphi inhlobo, ingadala ukuluma, ukuncinzwa nokuvuvukala. UDkt Lauren Streicher, ungoti owelapha izifo zabesifazane, uthe ukusebenzisa insipho kungadala ngisho iphunga nokulunywa. Uthe isitho sangasese asiyidingi insipho ngoba inamakhemikhali angalungile. Uncoma ukuthi kusetshenziswe okungenawo amakhemikhali ukugeza isitho sangasese.
Udokotela ukhuthaza nokuthi le ndawo ishayiswe ngomoya ngoba kujwayele ukucasha kuyo amagciwane kalula. Uthe kubalulekile ukushintsha njalo izimpahla zangaphansi, ezokujima nezokubhukuda. Kuthiwa umjuluko nawo ungadala inkinga.
Kumele kusetshenziswe imikhiqizo eyenziwe ngamanzi uma ufuna ukugcoba isitho sangasese ngaphambi kokuya ocansini. Kuyasiza nokuyoshobinga uma uqeda ukuya ocansini ukugwema izifo esithweni sangasese.
Ongoti bakhuthaza ukuthi usheshe ubone udokotela uma kukhona noma yikuphi ongakuqondi kahle.