Uncome uKatsande ezakhe ziphumelela
AKAWUVALI umlomo ngokuziphatha kukaWillard Katsande yize ebebhekene nesimo esinzima umqeqeshi weKaizer Chiefs, u-Ernst Middendorp.
Lo mqeqeshi usize iqembu lakhe lazibeka ethubeni lokuqeda ishobolo leminyaka emine lingafaki lutho okuyinkomishi ekhabetheni.
IChiefs idlule kwiChippa United ngo 4-2 kowandulela owamanqamu weNedbank Cup okuyibeka kowamanqamu neTS Galaxy emdlalweni ozokuba seMoses Mabhida Stadium, eThekwini, ngoMeyi 18.
Ngemuva kwalo mdlalo, uMiddendorp uthe ubone kungcono aziyele yena kuKatsande ngemuva komdlalo eyomhalalisela ngokuthi noma bangakhetha bani ngokwakhe (lo mqeqeshi) leli bamba likakaputeni yilona ebelimgqamele ngendlela emangalisayo.
Ezinyangeni ezimbalwa kuke kwasuka ukukhuluma kubathandi beChiefs ngokusala ngaphandle emdlalweni wabakhaya ne-Orlando Pirates kukaKatsande. Lokhu kulandelwe ukuthi aphinde angabonakali ngisho ebhentshini uKatsande kweminye imidlalo okwenze abaningi babona ukuthi sesiphelile isikhathi salo mdlali kuMakhosi ngoba sekucacile ukuthi uMiddendorp akamdingi.
Ngemuva komdlalo weChippa obusePort Elizabeth ngempelasonto, uMiddendorp uchome uKatsande uphaphe lwegwalagwalala, emncoma ngokubhekana nesimo esinzima njengomuntu osekhulile ngokomqondo.
“Kufanele abadlali abancane babukele kuKatsande njengesifundo. Uke wabhekana nesikhathi esibi eqiwa yijezi ekubeni engumdlali othathwa njengomkhulu eqenjini. Abaningi badikibala kodwa yena ubazi ukuthi yini ebimenza ukuthi angadlali wasebenza kanzima eyilungisa.
“Into ebengiyibanga naye uthando lwakhe lokudlalela emuva aphinde aphase
emaceleni isikhathi esiningi. Bheka manje ukuthi wenza njani uma ephethe ibhola, ucabanga phambili. Kuhle lokhu engikubone kuyena futhi ngiyaphinda ngithi uyisibonelo esihle kubona bonke abadlali abasenesifiso sokufika ezingeni lakhe ngokwesipiliyoni,” kusho uMiddendorp.
Lo mqeqeshi uthe uyakujabulela ukuthi uzodlalela owamanqamu eThekwini kodwa ngeke nangengozi bayithathe kancane iGalaxy ngoba isizivezile ukuthi iyingozi kangakanani.
“Kusemqoka ukuthi siyihloniphe iGalaxy. Esingakucela nje kubalandeli ukuthi baphume ngobuningi babo ngoba bayazi sidlala kangcono uma bebaningi,” usho kanje. Namuhla ngo-7.30 ebusuku iChiefs izokwamukela iLamontville Golden Arrows kowe-Absa Premiership oseFNB Stadium, eSoweto.