Bazonika iGalaxy ithuba lokuziveza
KUHAMBE ngokwezisifo zomqeqeshi weTS Galaxy, uDaniel “Dan Dance” Malesela ehlangana neKaizer Chiefs kowamanqamu weNedbank Cup ngoba ubona ukuthi (iChiefs) iyona ezobanika ithuba elingcono lokuzikhangisa kubathandi bebhola kuleli nangaphandle.
UMalesela ubebuzwe ungakadlali oweChippa United neChiefs ukuthi yiliphi iqembu angakujabulela ukubhekana nalo kowamanqamu phakathi kwabaqashi bakhe abadala neChiefs. Nakuba ebengazimisele ngokuphumela obala kodwa ugcine ebhobokile ngokuthi ukubhekana neChippa kungamhlaba umxhwele kodwa iChiefs iyona engcono uma bezimisele ngokubeka iGalaxy ebalazweni.
“Ngeke ngizikhethele
ukuthi ubani engithanda ukubhekana naye kodwa iqiniso ukuthi iChippa kuzongihlaba umxhwele ukubhekana nayo kwazise sengike ngasebenza kuyona kodwa iChiefs iyona engcono. Ngithi iChiefs ingcono ngoba yona izoheha abantu abaningi okuzobe kuchaza ukuthi sinethuba lokuqhubeka siziveze phambi kwabantu abaningi. Esikwenze kwi-Arrows namuhla kuyisikhangiso esihle ngebhola lethu. Kuyisikhangiso esihle ngalaba badlali (okungekho noyedwa kubona owangaphandle), kuhle lokhu nangegama lami njengomqeqeshi,” uqhube kanje uMalesela.
Kumphathe kabi ukujaha kwezakhe ibhola esiwombeni sokuqala ngoba uyena ojwayele ukwenza lokho kwamanye amaqembu kodwa uneme ngendlela okulunge ngayo esiwombeni sesibili.
“Esiwombeni sesibili nangesikhathi esengeziwe bese sibabambe lapho bebancane ngakhona. Bese bekhathele. Bebengeke nokho bangakhathali ngoba sibalandelise ibhola isikhathi eside impela. Yebo sibe nenhlanhla yokuthola igoli ngasekugcineni okube ilapho ngaze khona ukuthi sizonqoba ngoba bese sibakhathaze kakhulu.”
Ngokusho kukaDan Dance, bazoyibhekisisa kahle indlela abasebenzisa ngayo abadlali ngoba sebebheke umdlalo wamanqamu ngoMeyi 18 kwazise ngeke besaba yingxenye yemidlalo yokuhlunga.
“Kusukela manje bazoshintshana kakhulu abadlali yize kungeyona indlela engithanda ngayo ukwenza izinto. Kusemqoka ukuthi sijabule kodwa sikhumbule ukuthi sinomdlalo eKapa ngoLwesithathu. Ngeke siwujimele lowo mdlalo kodwa iwona osezingqondweni zethu, hhayi owamanqamu.”