Kuphele isonto engazi ngengane edlwenguliwe
AKASASETHEMBI isikole sabakhubazekile umzali womfundi waseNanda, otshelwe sekuphele isonto ukuthi ingane yadlwengulwa esikoleni, yadliswa namaphilisi okuyelapha engazi.
Uyaveva umzali walo mfundi oneminyaka engu-13 ofunda esikoleni sabakhubazekile, KwaTiba, oThongathi, obehlala ngaphakathi khona.
Lo mzali eligodliwe igama lakhe ukuvikela ingane, uthe utshelwe okokuqala ngalesi sigameko ngoLwesithathu, esemcimbini wesikole. Ubevele ezobuya nayo ingane njengoba kuzovalwa izikole.
‘’Sithe sifika esikoleni sihamba nonina wendodakazi yami, satshelwa ukuthi kunodaba okumele luxoxwe nathi kodwa olungelubi. Kuthe sekuphele umcimbi sabizelwa ehhovisi likathishanhloko. Sitshelwe ukuthi ingane kusolakala ukuthi yadlwengulwa ngomunye umfundi, bazama ukungithinta bangangithola ocingweni,’’ kuchaza unina womfundi.
Uthe okumkhathazayo ukuthi ingane yayiswa eThuthuzela Care Centre iyohlolwa yena engazi, yanikezwa ngisho amaphilisi. Uveze ukuthi uthole ukuthi ingane yadlwengulwa ngoSepthemba 9, yayiswa eThuthuzela okuyisikhungo sabadlwenguliwe, ngoSepthemba 15.
‘’Angikwazwanga ngisho ukulala ngoLwesithathu sengizwe lolu daba. Ngiye esiteshini samaphoyisa eNanda bangibhekela ukuthi lavuiwa yini icala oThongathi. Ngithole ukuthi icala alivulwanga, ngalivula mina eNanda,” kusho umzali.
Uthe wayiyisa esibhedlela ingane emuva kokuzwa udaba, yaphinde yahlolwa. Kutholakale ukuthi akubonakali ukuthi yadlwengulwa kodwa uyasola ukuthi kungenzeka ukuthi yanukubezwa ngoba nayo iyavuma. Uthe useyasaba ukuyibuyisela kulesi sikole ngoba akasethembi lutho. Uveze ukuthi indodakazi yakhe ayikhubazekile emzimbeni kodwa ithatha kancane ngokomqondo. Uveze ukuthi kumanje ingane izobonana nosonhlalakahle ngesonto elizayo njengoba iphazamisekile ngenxa yesigameko.
UCaptain Nqobile Gwala okhulumela amaphoyisa eKZN:
“Isigameko kuthiwa senzeka oThongathi kodwa icala liphenywa uphiko oluphenya ngezigameko zodlame lomndeni, ukuvikelwa komndeni namacala ocansi eNanda,’’ kusho uCaptain Gwala.
Okhulumela uMnyango wezeMfundo esifundazweni uMnuz Sihle Mlotshwa, uthe bazojuba ithimba elizobheka udaba ukuze kuthathwe izinyathelo ezifanele. Uthe kungaba yiphutha uma lokhu kuyiqiniso ngoba abazali kumele babikelwe kuqala uma kunesigameko esithinta ingane.