Abafundi bamoshe izinsiza bebhikisha
BAPHIHLIZE amafasitela babulala izihlalo namadeski abafundi baseReunion Secondary, eSiphingo abathi abamfuni uthishanhloko omusha ozovala isikhala somdala ozothatha umhlalaphansi.
Kulesi sikole izifundo obekumele zibhalwe ngoLwesithathu nayizolo azibhalwanga njengoba kubhalwa izivivinyo.
Abafundi bakulesi sikole bavuke umbhejazane bethi akuqalwe phansi uhlelo lokuqokwa kukathishanhloko omusha ozovala isikhala sikaMnuz Mahalingam Padayachee, okuthiwa uzothatha umhlalaphansi ekupheleni kuka-Okthoba.
Kukholakala ukuthi abafundi bebecabanga ukuthi uthishanhloko uxoshiwe.
Akuveli ukuthi ulwazi lwangaphakathi mayelana nokuthi ngubani ozovala isikhala sikaPadayachee lufinyelele kanjani kubafundi njengoba kuthiwa bekunenhlololwazi ngoLwesibili.
Kule nhlolokhono bekuqhudelana othisha bakulesi sikole oyedwa kubo uthole amaphuzu amaningi.
Abebeyingxenye yokuphekwa ngemibuzo kwalabo thisha kuthiwa basayina isivumelwano sokugcina.
UMnuz Joshua Zuma uSihlalo wesigungu sabazali sakulesi sikole uvumile ukuthi kube nenhlolokhono kwavunyelwana ngothisha othize okunguye obethole amaphuzu amaningi.
“Inhlololwazi ibingoLwesibili, ngoLwesithathu abafundi babhikisha bethi abamfuni uthisha oqokiwe.
“Asazi ukuthi lokho bakuzwe ngobani ngoba lolo lwazi belusayimfihlo. NgoLwesithathu abazange babhale, nanamhlanje (izolo) akubhalwanga ngoba abafundi ekuseni bafike besadiniwe, balimaza amafasitela, nezitsha zokugezela izandla emathoyilethi.
“Sesikhulumile nabo bakuveza ukuthi bafuna kuqalwe phansi inhlololwazi.
“Kusasa isimo sizobuyela kwesijwayelekile.”
UMnuz Kwazi Mthethwa okhulumela uMnyango wezeMfundo KwaZulu-Natal, uthe abafundi bathukile ngesikhathi betshelwa ukuthi uthishanhloko okhona uyagcina ngoOkthoba kodwa wathi isimo sesidambile.
Omunye wabafundi obekhulumela abafundi emhlanganweni abebe nawo nesigungu sesikole ongathandanga ukudalulwa, uthe uthisha oqokiwe abamfuni ngoba phambilini uke wathatha amaselula abo ngoba awavumelekile esikoleni wangawabuyisa uma sekuphele unyaka.
“Amaselula akasetshenziswa esikoleni kodwa siyawaphatha singawavuli ngesikhathi sesikole, uma sesiphumile sishayela ngawo abazali.
“Yena uma ebona iselula isephaketheni uyayithatha, akabheki ukuthi ivuliwe yini. Uma engaba uthishanhloko kusho ukuthi sizophucwa amaselula,” kusho yena.
Omunye wothisha ongavumelekile ukukhuluma nabezindaba, uthe umgomo wokungasetshenziswa kwamaselula esikoleni wenziwa ngenxa yokuthi abafundi bebesebenzisa amaselula, namawashi ukuthola izimpendulo uma kunezivivinyo.
UZuma uthe uma sekufike isikhathi sokuthi amaselula asetshenziselwe ukufunda umgomo uzochitshiyelwa kodwa okwamanje umgomo wesikole usathi awangasetshenziswa ngoba bebewasebenzisa ngokungafanele.