Bavale umgwaqo bethi abanakiwe
ABAHLALA kolindela eSiphingo bavale umgwaqo ngamathayi avuthayo izolo ngoba bethi uMasipala weTheku awuthi vu mayelana nokuthi bazosuswa nini kule ndawo eyingozi.
Bathe nyakenye bathenjiswa ukuthi bazosuswa kolindela asebehlale kubo iminyaka ewu11 kade kwakuthiwe bazohlala izinyanga ezintathu.
Uthe indawo yaseSiphingo enye yezindawo okulula ukuthi ihlaselwe yizikhukhula uma lina. Ngenxa yalokhu kwathiwa umasipala uzoqala izinhlelo zokuzama ukususa abahlala kuyo ngokushesha.
UMnuz Thulani Danisa, usihlalo wekomiti lomphakathi, uthe ngoFebhuwari batshelwa ukuthi umasipala uzoqala ukulungisa umhlaba okuNkanku Road, eSiphingo, ukuze kwakhiwe kuwo. Ekuqaleni kwenyanga kwathiwa kuzobe sekuqalwa ukusetshenzwa kodwa babona kuthule. Uthe emasontweni amabili edlule bebelindele ukuthi amakhansela nezinye izikhulu zikamasipala zizobachazela ukuthi uhlelo lukusiphi isigaba emhlanganweni athe abafikanga kuwo.
“Ikhansela salithinta sicela ukuthi lisitshele ukuthi kwenzekani laxolisa emhlanganweni esasiwuhlelile. Sabona ukuthi akekho ofuna ukusiphendula kungcono sivale umgwaqo mhlawumbe ukhona ozofika azosilalela ukuthi sithini.”
UMnuz Mandla Nsele, inhloko ebambile kwezokuxhumana kuMasipala weTheku, uthe ukushoda kwemali nemicikilisho yomthetho okumele ilandelwe kwenza ukuthi uhlelo lungahambi ngesivinini esilindelekile .
“Njengamanje umasipala usohlelweni lokufaka isicelo sokuthi izindawo ezikhethiwe zihlolwe ukuthi azikho yini izinto eziyimvelo ezizophazamiseka uma kwakhiwa kuzo, i-environmental impact assessment, kubhekwe nokuthi kuleyo ndawo kuzofakwa amapayipi okuhanjiswa kwendle nezinye izinto,” kusho uNsele.