Uchazwe njengensika owe-ANC
LICHAZWE njengensika iPhini likaNgqongqoshe lezokuMbiwa Phansi nezaMandla, uNksz Bavelile Hlongwa, izolo enkonzweni yesikhumbuzo ebiseCity Hall eThekwini.
Indodana kamufi uLucky Hlongwa, ithe unina ubeyinsika ebihlanganisa wonke umndeni.
ULucky uthe kusenzima ukwamukela ukuthi unina akasekho emhlabeni.
“Angazi ngingaqalaphi uma ngikhuluma ngomama ngoba usenzela konke nezingane zakwethu. Sibe naso isikhathi naye, safunda okuningi kuyena. Ubengeyena umuntu olula, ubebuye aqinise isandla. Siyamthanda futhi sohlala simthanda,” kusho uLucky.
Umfowabo, uMnuz Sthembiso Hlongwa, uthe bafe olwembiza ngokulahlekelwa wudadewabo obevele ekhombisa izimpawu zokuba wumphathi kusuka kudala.
“Udadewethu ubengumuntu onamandla amangalisayo. Ubeluthanda ubumbano, ubeke asifonele sonke uma kukhona ukushayisana kwemibono ekhaya, alungise isimo. Silahlekelwe kakhulu ngokuhamba kwakhe, sikhalela umama kakhulu njengomuntu abebebambisene naye kakhulu ekhaya,” kusho uHlongwa.
Ushiye unina uNkk Bukani MaNzuza Hlongwa, izingane zakwabo, nezingane zakhe ezine.
Umngani wakhe, uNksz Nokuthula Danisa, umchaze njengomuntu obekholelwa kuNkulunkulu futhi esebenza kwanzima.
“Uma kukhona inkinga anayo ubethi ngikhulekiseni makhosikazi ngoba ubekholelwa kakhulu kuNkulunkulu. Ubengumuntu omnene nonothando. Ubesebenza ngokuzikhandla. Ubengumuntu wabantu futhi ethanda ukubasebenzela ukuze bathuthuke,” kusho uNksz Danisa.
Abebesebenza naye kuhulumeni bancome ukuzikhandla kwakhe emsebenzini.
Isikhulu somnyango abesebenza kuwo, uMnuz Thabani Zulu, sithe: “Kube izinyanga ezintathu kuphela sisebenza naye emnyangweni wethu kodwa ngathi bese kuyiminyaka emithathu ngenxa yezinto ebese sizenzile naye. Kokunye ubeke anqabe ukusayina isicelo esithize ngoba ethi imali ingasetshenziswa kangcono kunalokho. Uhambe sisamdinga.”
UNksz Hlengiwe Hadebe obengunobhala wakhe, uthe isikhathi ubengasazi futhi efukuzisana.
“Ubungekho uKhisimusi noNcibijane noma uMgqibelo. Bekuhlezi kusetshenzwa, umsebenzi ewufuna wenzeke ngendlela.”
Kube nenhlokomo ngesikhathi kufika owayenguMengameli wezwe, uMnuz Jacob Zuma.
UZuma ubehamba noMengameli we-ANCWL uNksz Bathabile Dlamini.