Uzoba sekhaya obuya ejele
KUBE nezinyembezi zenjabulo owesifazane wase-Eastern Cape owaboshelwa ukushushumbisa izidakamizwa eThailand efika kuleli izolo esikhumulweni sezindiza i-OR Tambo eGoli.
UNolubabalo Nobanda (31) waba sematheni eboshwa ne-cocaine ewu-650 grams, eyayiphothelwe ezinweleni, uhlangane nomndeni wakhe okokuqala selokhu abhadla ejele iminyaka eyisishiyagalombili.
Ngesikhathi bebonana namalungu omndeni wakhe, bavele bakhala mi izinyembezi, babambana bejabulelana.
UNolubabalo ekhuluma ne-eNCA, uthe ukujabulele ukubuyela ekhaya.
“Engingakusho manje ukuthi kumnandi ukubuyela ekhaya, sesiside lesi sikhathi ngingawuboni umndeni wami. Abomndeni wami ibona ebebengisiza ngingekho lana. Ngibuyele ekhaya senginamandla. Okwamanje into engiyifunayo ukuthi ngibe nomndeni wami ngoba kade ngabagcina. Ngifuna sihlale sixoxe ngesezadlula. Ngikhathele, abemaningi la mahora ngiwahamba,” kusho uNolubabalo egcwele izinyembezi emehlweni.
Uqede ukukhuluma wangana nonina abelokhu ebambene naye. UNolubabalo owaboshwa ngo2011, useneziqu zeCommunications zaseUnisa.
Waboshwa wagwetshwa iminyaka ewu-30, isigwebo sabuye sehliswa, kwiminyaka engu-15, ngenxa yokuziphatha kahle kwakhe.
Kulindeleke ukuba asuke eGoli athathe indiza eya e-Port Elizabeth.
Ebuzwa ukuthi ngabe usefuna ukuba inxusa yini eluleke izitshudeni zakuleli ngezidakamizwa, uthe kuningi impela afuna ukukwenza kodwa okwamanje usajabulela ukuthi usekhaya, uzobuye achaze kabanzi ngezinhlelo anazo. Uthe akuphelile ngaye ngoba uzobakhona emehlweni abantu.
Phakathi kwabanye abebezomamukela, bekukhona umndeni, abangani nommeli wakhe.