Lucasule amakholwa uhlelo lwenceku evelele
AYAVEVA amakholwa ngohlelo lwethelevishini olubheka umshumayeli ovelele, ozowina kulona ozothola umklomelo ofika kuR1 million.
Lolu hlelo olubizwa ngeCalling The Called, luzodlala esiteshini iGau TV, okuqalwe ngoLwesibili eState Theatre ukwenziwa kwenhlolokhono yalo. Inhlolokhono iphele izolo eGoli, lapho abaqokiwe bezodlulela phambili ukuncintisana amasonto angu-13.
Abangenele banikezwa imizuzu emibili ukuveza ikhono lokushumayela phambi kwamajaji okubalwa uDkt David Molapo, Apostle TA Ralegoelela, Bishop Paul Schell (waseMelika) no-Ayanda Ncwane. Selokhu kusabalele ama-video ezinkundleni zokuxhumana abazalwane bakhombise ukunengeka ngalolu hlelo, abathe lwehlisa isithunzi sevangeli.
UMfundisi OT Dlamini oyiPhini likaMbhishophi weNatal Coastal Synod eWeseli, uthe yichilo leli. Uthe usesondele ekuthatheni umhlalaphansi ebufundisini kodwa uyaqala ukuzwa ukuthi ukushumayela kungaba umncintiswano.
“Uma ngiyoshumayela angisho engikuthandayo kodwa ngilalela uNkulunkulu bese ngidlulisa umyalezo kubantu. Awukaze uzethembe wena kodwa uhlala uthuthumela uma uzokwethula umyalezo kaNkulunkulu. Ukushumayela ugcobo futhi awukwazi ukuzikalela isikhathi ngoba uholwa uMoya oyiNgcwele. Ukuwinisa abashumayela kahle imali kusho ukuthi ivangeli seliyadayiswa,” echaza.
UMfundisi Vusi Dube we-Ethekwini Community Church ungomunye wabahlabe lolu hlelo. Ubhale kuFacebook ukuthi: “Lokhu kuyihlazo ngokwezwi likaNkulunkulu. Singobani thina ukwahlulela ubizo nababizelwe ivangeli,” kusho uDube.
Lolu hlelo ludidiyelwe yiZallywood Productions futhi ngelokuqala kuleli. Emiklomelweni ezowinwa kubalwa imoto kanokusho nezifundo zeBhayibeli.
Esitatimendeni esikhishwe uMnuz Ngwako Serepe okhulumela iZallywood Productions, uthe bahlose ukuveza ikhono lokushumayela elinganakiwe. UMqondisi wohlelo uNksz Ruth Mabona uthe babheke onekhono lokushumayela kodwa oshoda ngezimfanelo zokuvula isonto.
“Abanye balaba bantu bashumayela emgwaqweni, emabhasini nasezitimeleni. Sifuna ukubanika ithuba elanele lokuqhuba umsebenzi wokushumayela,” kusho yena.
Abanye baphawule kanje ekhasini likaFacebook leGau TV:
UMsizi Praise Gumede uthe: “Angiqondi ukuthi luhloseni lolu hlelo. Ivangeli selehlelwe isithunzi sekudlalwa ngalo.”
UTsholofelo Nchadinyana Tongwane uthe, “Ngebhadi ngeke nifike kwezinye izifundazwe, bengizonilinda nemvubu.”
UMabone Wealthy uthe: “Thula! ushumayela ukuthola uR1m nemoto. Uyazenzisa usenyameni.”
“Ukushumayela akusona isiphiwo kodwa ugcobo. Lokhu wukugcwalisa isonto nje kodwa lutho ugcobo,” kusho uDivine
Yawo Akorli.