KONKE SEKUMI NGOMUMO NGOWE-DURBAN BUSINESS FAIR
IZIFUNDO eziningi okubalwa ezokupheka, ukukhangisa ngomkhiqizo wakho, ezobuchwepheshe, izingqungquthela okucotsholelwana kuzo ngolwazi lwamabhizinisi, ukucathulisana kwabesifazane ngendlela ezobathuthukisa, namanye amabhizinisi endawo, yikona okuzobe kuseqhulwini embukisweni walo nyaka weDurban Business Fair.
Indikimba yakulo nyaka ithi ‘Indlela ebheke oshintshweni’, umbukiso wakulo nyaka uzoqala ngoSepthemba 25 uphele ngoSepthemba 29, eNkosi Albert Luthuli Convention Centre (ICC) nase Durban Exhibition Centre. Njengoba kuzophinde kube nezingxoxo eziphathelene nezobuchwepheshe noshintsho, lo mcimbi ozodonsa izinsuku ezinhlanu uhlose ukubhekisisa kahle okwenziwa ezobuchwepheshe kwezamabhizinisi kanjalo nokugqugquzela ushintsho kwezamabhizinisi.
Okunye okuzobe kukhona embukisweni omkhulu, ozoqala ngoLwesihlanu, e Durban Exhibition Centre (Septhemba 25 uphele ngeSonto) izinkundla zokucobelelana ngolwazi. Kuzona lezi zinkundla zokucobelelana ngolwazi, kuzobe kukhona osomabhizinisi abanohlonze nosaziwayo.
Inhloso yabo kuzobe kuwukugqugquzela izethameli nosomabhizinisi abasafufusa besho namathuba akhona abangawasebenzisa ekuthuthukiseni amabhizinisi abo. Kuzobe kukhona: • I-Business Indaba Lesi sithangami sizogxila kwezamabhizinisi njengokuthi yiliphi iqhaza elingadlalwa osomabhizinisi bendawo emphakathini nasekukhuliseni umnotho wendawo emalokishini nasezindaweni zasemakhaya. Kuzophinde kube nezikhulumi ezinohlonze, ithimba elizobe lihlahla indlela. Lesi sithangami sizovulwa yiMeya entsha yaseThekwini uKhansela Mxolisi Kaunda futhi kuzoba nezikhulumi ezivela eTransnet Port Authority, Sekunjalo nabase-Southern African Shipyards nabanye. • Ingqungquthela yezamandla • Ukuthuthukiswa kwabesifazane kwezomnotho
• Ukufunda ukuhweba namanye amazwe • Ukufundiswa ngokuthenga impahla • Ingqungquthela ehlanganisa intsha engosomabhizinisi • Ukufundiswa ngomculo • Ukufundiswa ngamafilimu • I-Durban Fashion Fair Kungenwa bhusende Kungenwa mahhala kwi- Durban Business Fair. I-website - www.dbnbusinessfair.com Facebook page - @Durban Business Fair Twitter - @DBNBusinessFair Instagram - Durban_Business_Fair