Saze saphenduka inhlekisa sizwe sakithi
MHLELI:Ngivumelana nalokhu engikufunde kweliwela umfula ugcwele langomhla ka-11 kuSepthemba, ngemingcwabo eseyaphenduka isiphihli sedili likaMkhipheni ongathi umshado uqobo.
Lafa elihle kakhulu! Abantu uma behanjelwe izihlobo sebencamela ukungena shi ezikweletini ngenhloso yokuthi bafuna ukuvalelisa izihlobo zabo ngendlela “enesizotha”. Sekwaqashwa amatende amise okusandlu, angisayiphathi eyemihlobiso esuka lapho kungenwa etendeni ungaze ufunge ukuthi kuzoshadwa omkhulu umshado. Konke lokhu kumba eqolo, uma uthi uyayibala imali esebenzile, ubone ukuthi kusetshenziswe nemali ebingasala isiza amalungu omndeni.
Impela uma ungashadanga usadla anhlavana, uvaleliswa ngomshado. Abantu bagqoka baconse, ungaze ufunge ukuthi kusembukisweni wezemfashini. Ngempela uma ungasikanga ingqephu yombala omnyama, usele ngoba hhayi ngane yakwethu kufakwa emikhulu imihelane le, uze ungamboni nomfundisi ngaphambili.
Angilwi nemihelane emingcwabeni kodwa ngibona kungakuhle uma kungafakwa izigqoko ezanela kahle ikhanda nje. Konke loku ngikusho ngokwazi kwami njengomuntu okholwayo, nasemingcwabeni bakhona abadinga ukuzwa intshumayelo yomfundisi, ukuze baduduzeke nabanye bathole ithuba lokubuyela eNkosini.
Phambilini imingcwabo kwakuba into nje lapho kuvaleliswa osehambile emhlabeni, imindeni yayisebenzisa imali eyayinayo. Uma umndeni ungenakho, omakhelwane babefaka isandla ngokuphekisana. Wawuletha noma yini onayo ukuthi ingalekelela kufihlwe isihlobo ngesizotha. Abantu babefaka abanako, hhayi le nselelo yokuthi kumele uswenke uze ufake namaxhumela emngcwabeni. Okukhulu kunako konke, sebevele baswenke baconse bese bayashutha bafake ezinkundleni zokuxhumana, babhale oRest In Peace no-funeral vibes ongathi kuhalaliselwa ukushona komuntu.
Konakala ezweni, ukubiza kwemingcwabo sekwadala ukuthi abantu bangahloniphi. Ngisho nomcimbi omncane ebakhona emuva komngcwabo abayaye bakubize nge-after tears. Saze saphenduka inhlekisa isizwe sakithi, buya Mdali uzoqoqa ibandla lakho, sekwanele. Mandisa Mchunu EHAMMARSDALE