Uhulumeni akanake ingqalasizinda yezemidlalo
MHLELI: Angibingelele abafundi bephephandabba elihamba phambili kwelakithi. Ake ngiveze umbono wami ngokuphapha kwabantu abafuna ukuhlohla indaba yebala kwezemidlalo kuleli, ikakhulu kwikhilikithi nebhola lombhoxo. Ngicabanga ukuthi abadlali, abaqeqeshi nabaqondisi kwezemidlalo kumele bathole ithuba ngoba befanele hhayi ngokubheka ibala.
Ukwenza isibonelo, abantu bafaka ingcindezi kubaphathi beCSA ukuba baqashe u-Ottis Gibson (omnyama ngokwebala) oshaye udaka kwiNdebe yoMhlaba esongwe ngenyanga endlulu. Sekuwumlando nokho ukuthi sabhula amazolo nomqeqeshi wethu “omnyama”. Yebo yena uGibson unawo amagalelo kwezokuqeqesha kodwa cha ngangibona engakabi namagalelo angamenza abe umqeseshi weqembu lesizwe.
Ngize kwelombhoxo, sanika umqeseshi omnyama, (omunye angathi ulikhaladi) u-Allister Coetzee ukuba asiyise phambili, naye wahluleka wancama, saze sehla nakumaWorld Rugby Rankings ngenxa yokuba wukudla kwenduku. Angingabazi ukuthi sizofika kowamanqamu eNdebe yoMhlaba ngoRassie Erasmus.
Ngicabanga ukuthi kumele sisole uhulumeni ngakho konke lokhu. Ngeke uthi ufuna abadlali abamnyama balingane noma babe ngaphezulu kwabamhlophe kodwa ube uhlulwa ukwakha ingqalasizinda ebantwini.
Uma ukhuluma ngezemidlalo nje enganeni uyathola ukuthi yazi i-netball kuphela ngoba vele iyona midlalo ekhona. Nasezikoleni zethu thina ndlu emnyama nasemakhaya ayitshalwa eminye imidlalo efana nezokusubatha, ezokubhukuka, ikhilikithi, i-basketball, i-hockey, i-volley ball neminye eminingi.
Wona lo hulumeni wenu uhlulwa ukwakha izinkundla zezemidlalo. Kodwa uhulumeni uphupha ethi ufuna silinganiswe kwezemidlalo ezikwatini.
Ngabe sihlezi sicoboshisa kwasani emiqhudelwaneni yamazwe ngamazwe ukuba besinohulumeni okhathalele ezemidlalo njengoba ekhathalele ezamathenda. Ngicabanga ukuthi neSASCOC kumele yenze okuthize uma ifuna uguquko kwezemidlalo.
Ngincoma nesenzo esihle seSafa sokuqasha umqeqeshi omuhla uMolefi Ntsek. Nginethemba lokuthi uzobuyisa izinsuku zenjabulo ezweni kwazise sekuneminyaka eyibambile kwiSafa, amagalelo akhe angiwangabazi nakancane. Sibahle Ngobese ENQUTHU KWANGEDLA