Izimpawu zetwetwe ngoweBoks ne-All Blacks
KUGXABHA izisu kubathandi bombhoxo baseNew Zealand ngomdlalo ka-Pool B wokuvula iNdebe yoMhlaba nezimbangi zabo ezindaba amaBhokobhoko kusasa ngo-11.45 ekuseni, eYokohama Stadium, eTokyo, eJapan.
Umlando ukhomba ukuthi iNew Zealand iyona esethubeni lokuqala kahle lapha kodwa isimo iqembu elikusona uma uzoqhathanisa neleNingizimu Afrika umehluko uyacaca. Emidlalweni emithathu edlule phakathi kwala maqembu, lilinye liwine owodwa komunye badlala ngokulingana. Kuyaqapheleka ukuthi kuyona le midlalo umehluko ngamaphuzu ngabe awokuwina noma awokuhlulwa, ungaphansi kwamabili.
Umuzwa ovela kwabasondelene nombhoxo eNew Zealand ukhomba ukuthi bayaqonda ukuthi iqembu labo selikhulile ngokweminyaka, okubabeka ethubeni ngokwesipiliyoni kodwa amaBhokobhoko axube sona (isipiliyoni) nokuba iziphekepheke kwabafana abancane.
Lokhu kufakazelwe uhlelo lwethelevishini lwakhona okumenywa kulona abadlali nabaqeqeshi bakudala. Kolwayizolo uhlelo bebehlukene phakathi ngabadlali okufanele baqale umdlalo nangokuthi yiliphi iqembu elizowina.
Abanye babona kungcono kuqale abanesipiliyoni bese kuthi abafana abancane kucushwe ngabo ebhentshini.
Abanye babo bayaphikisana nalokhu ngoba babona ukuthi kuyothi kuqambe kufakwa labo bafana abancane umonakalo ube usumkhulu kakhulu. Kukhona nendaba yonondweba lapho, esiyenze kwaze kwaba nokuklolodelana ngamazwi phakathi kukaSteve Hansen weNew Zealand obone kungcono aphendule kobekushiwo uMzwandile Stick ngonondweba. “Ngiyayihlonipha iNingizimu Afrika kodwa lokho abakushoyo anginandaba nakho. Asikho isidingo sokucindeza onondweba ngoba lokhu akwenzayo sonke siyakubona,” usho kanje. Ubephendula okushiwo uMzwandile Stick oyiphini likaRassie Erasmus lapho ecele khona kunondweba ozobe ephethe umdlalo ukuthi awuyeke lo mkhuba wonondweba wokuthambisa isandla emazweni ayizethenjwa.
Imidlalo yeNdebe yoMhlaba yaseJapan kule mpelasonto imi kanje: Kusasa: Australia v Fiji (Sapporo Dome, 6.45am); France v Argentina (Ajinomoto Stadium, 9.15am); New Zealand v South Africa (Yokohama International Rugby Stadium, 11.45am). NgeSonto: Italy v Namibia (Higashiosaka Hanazono Rugby Stadium, 7.15am);