UPitso uthembele ezindebeni ezinkulu
USEZOGXILA ekuwineni “izindebe ezinkulu” umqeqeshi weMamelodi Sundowns, uPitso Mosimane, ophinde wahluleka ukuwina indebe yeMTN 8.
ISundowns ihlulwe yiSuperSport United 3-1 kowandulela owamanqamu uma sekuhlanganiswe imiphumela yemilenze yomibili.
UMosimane kade kuyisifiso sakhe esikhulu ukuwina iMTN 8 kwazise yiyona kuphela aseshoda ngayo ukuze aqophe umlando wokuba ngumqeqeshi wokuqala osewine zonke izindebe kwiSundowns.
Emuva kokushabalala kwephupho lakhe, uMosimane uyivumile induku, wathi bazogxila ezintweni ezinkulu.
ISundowns ikwiCAF Champions League lapho ilwela khona ukungena esigabeni samaqoqo. Igcine kowamanqamu wendebe ngo-2016 ihlulwa yiBidvest Wits kwiMTN 8.
Mayelana nokuqhubeka kweshobolo lokuhlulwa yiMTN 8, uMosimane uthe:” Nami angazi. Mhlawumbe sidinga isangoma (esizosho). Angifuni ukubeka ukuziqhayisa kwami kule ndebe ngoba akuqondene nami ngedwa, kumayelana neqembu. Uma kumayelana nami, sengake ngayiwina le ndebe. KwiSundowns angikayiwini kodwa kukhona ezinye izindebe esingaziwina.
Yingani kufanele ngikhononde, ngingabancomi abanye abaqeqeshi?
“Sinomdlalo ngoMgqibelo okufanele siwulwele. Ebholeni uma uhluliwe, wawina umdlalo olandelayo uzizwa ungcono. Sizogxila kwiPremiership manje neChampions League.
“Uma singawina iligi neChampions League, kulungile ukuhluleka kwiTelkom. Kufanele sithole izindebe ezinkulu.
Angisho ukuthi lena (MTN8) incane. Kodwa kufanele ubheke ngoba ibhola lase-Afrika libalulekile futhi silibeka phambili kwiSundowns. Angisho ukuthi iMTN 8 asiyibeki phambili. Kufanele sikwamukele ukuthi ngesinye isikhathi kumele sihlulwe,“kusho uMosimane.
ISundowns izokwamukela iMaritzburg United kusasa emdlalweni weligi eLucas Moripe Stadium, e-Atteridgeville, ngo-6 ntambama. Umqeqeshi weMaritzburg United u-Eric Tinkler, uthe sesadlula isikhathi lapho khona kwakwaziwa umdlalo ungakaqali ukuthi ubani ozowina. “Kungenzeka noma yini ngoba sesizibonile izimanga kunqoba iqembu obekuthiwa ngeke linqobe. Abadlali bami bakhombisa ukuwuthakasela lo mdlalo futhi bakhombise ukuzinikela okuyisimanga emidlalweni yobungani esiyidlalile.
“Ngijabule ukuthi kubuye uGabriel Nyoni, Thamsanqa Sangweni noMiguel Timm abebelimele. Ngikhathazekile ukuthi emidlalweni edlule sakhe amathuba angaphezu kuka-40 kodwa sehluleka ukushaya amagoli. Sizamile ukuyilungisa leyo nkinga ngethemba lokuthi emidlalweni yethu elandelayo sizowabona amagoli,” usho kanje uTinkler.