UDa Gama ushumayela ivangeli lokubhekana nomdlalo ngamunye
UKUBONA amaqembu athathwa njengamancane enqoba izindebe bese ekugcineni ezabalezela amaphuzu kwi-Absa Premiership yisimo azimisele ngokusigwema umqeqeshi weHighlands Park, u-Owen Da Gama.
I-Lions of the North, ekhuphukele esigabeni esikhulu ngesezini edlule, izibekisele indawo kowamanqamu weMTN 8 ihlula iPolokwane City ngo 4-3 kumaphenathi kuleli sonto. Izobhekana neSuperSport United kowamanqamu ozokuba se-Orlando Stadium ngo-Okthoba 5 ngo-6 ntambama.
I-United iguqise iMamelodi Sundowns ngo 2-0 emlenzeni wesibili womdlalo owandulela owamanqamu ngemuva kokuthi owokuqala waphela ngo 1-1.
UDa Gama akafuni abadlali bakhe babuswe kakhulu wukwekhala bemuke nesicoco seMTN 8 kodwa ufuna bagxile emdlalweni ngamunye njengoba ngeSonto bemelwe iBaroka FC kowe-Absa Premiership ngo-3 ntambama.
“Sesikhohliwe umdlalo wamanqamu. Sesigxile kwiBaroka esidlala nayo. Sizocabanga ngowamanqamu uma ususondele. Okwamanje isinkwa sethu silele kwiligi, yilapho okumele siqondise khona izinto ngakho sizozama ukubehlisa njengoba begcwele injabulo nje,” kusho uDa Gama.
Le ndlela uDa Gama ayihamba neHighlands Park akayiqali njengoba eseke waba kuyona neSilver Stars.
Wanqoba nayo isicoco seTelkom Knockout ngo-2006 kwathi kuyona leyo sizini baqeda endaweni yesibili kwiligi ngemuva kwamasizini ambalwa bekhushulelwe esigabeni esikhulu.
UDa Gama ugcizelele ukuthi akusikhona ukuthi ngeke bakulwele ukuba ngompetha beMTN 8 ehambisana nesheke lika-R8 million kodwa okusemqoka kuyena wukuthi abadlali bathole isipiliyoni okuyisona esizoqinisa iqembu nangomuso.
“Kumele sicophelele. Sesike sabona amanye amaqembu athathwa njengamancane enqoba indebe bese eshona phansi (kwiligi). Sikubonile lokho ngesizini edlule kwiBaroka. Bawina (iTelkom Knockout) kodwa bagcina bethwala kanzima. Kumele sifunde kokwenzeka kwamanye amaqembu. Babhekana nomdlalo ngamunye. Akusikhona ukuthi asifuni ukunqoba (iMTN 8) kodwa okusemqoka kimina wukwakha iqembu, negama labo abadlali bathole isipiloyoni esizobenza abadlali abangcono,” kusho uDa Gama.