UMarumo uthipha iBucs ekumukeni nesicoco
INGWAZI yakuleli ezakhele igama kwiMamelodi Sundowns nePlatinum Stars, uHareaipha “Simba” Marumo, ikholelwa ekutheni i-Orlando Pirates iyona ezokhala yemuke nesicoco se-Absa Premiership kule sizini.
UMarumo, okhulele kwinkulisa ye-Inter Milan e-Italy, uthe nakuba iPirates yehlelwe yifomu kulezi nsuku ngaphansi kukaRulani Mokwena kodwa ukholelwa ekutheni isazobuya ngamandla inqobe isicoco seligi.
Selokhu kushiye uMilutin “Micho” Sredojevic kwiBucs, izinto azihambi kahle.
Sekungumlando ukuthi iPirates isiphume emiqhudelwaneni emibili okubalwa kuwona iMTN 8 neCAF Champions League.
Nokho ngesonto eledlule, kuthe dwi kubalandeli beZimnyama zinqoba okokuqala ngaphansi kukaMokwena, zishaya iChippa United ngo 2-1.
UMarumo uthe nakuba evuma ukuthi iPirates ayibukeki, okwamanje, njengeqembu elinganqoba isicoco seligi kodwa ingasinqoba.
Le ngwazi ihambele umqhudelwano iCopa Coca-Cola, osongwa kusasa eKing Zwelithini Stadium, eMlaza. UMarumo ohlola ikhono kulo mqhudelwano.
Uhambisana noJabulani Mendu odume kwiMoroka Swallows neKaizer Chiefs, noLucky Lekgwati obengukaputeni wePirates.
“Embangweni weligi ayisoze yasala iMamelodi Sundowns kodwa ngithipha iPirates. Ngokwami yilona qembu elinesikwati esisezingeni eliphezulu futhi esingashaya kwasani, inqobo nje uma bezodlala njengeqembu babambisane,” kulandisa uMarumo.
Kusasa eZimnyama zizobhekana neBidvest Wits emdlalweni we-Absa Premiership eMoses Mabhida Stadium, eThekwini.
“Esinye isizathu esenza ngithi ngibona kuyiBucs ezonqoba isicoco seligi, nguRulani Mokwena ongumqeqeshi. Ngiyafisa anqobe lesi sicoco ngoba kuleli asikholelwa entweni yakithi, sithanda abelungu baphesheya kwezilwandle. Kuleli asibekezeli nhlobo uma kungumqeqeshi wakuleli owenza amaphutha, sifuna ukuthi umqeqeshi axoshwe.
“Kodwa nxa kungumqeqeshi waphesheya kwezilwandle siyabekezela, size sithi lo muntu akanikwe ithuba ekubeni naye enamaphutha.
“Ngokwami ukubona ukunqoba kukaRulani isicoco seligi kungasho ukuthi kuzovuleka iminyango kubaqeqeshi abasebancane bakuleli. Kungakho ngithi akanikwe ithuba,” usho kanje uMarumo.
Le ngwazi iphinde yaveza elinye iphuzu ekholelwa ekutheni abanikazi bamaqembu kufanele balizwe.
“Uma abaqeqeshi abasebancane benganikwa ithuba bazosithathaphi isipiliyoni? Bazofunda nini? Kufanele baye eSwaziland, Uganda noma eKenya? Sinakho konke nje kulaleli, abanikwe ithuba abaqeqeshi abasebancane kwaphela,” kubeka uMarumo. Imidlalo ye-Absa Premiership:
Kusasa: Polokwane City v SuperSport United (Old Peter Mokaba Stadium, 3pm); Stellenbosch v Black Leopards (Athlone Stadium, 3pm); Chippa United v Bloemfontein Celtic (Nelson Mandela Bay Stadium, 3pm); Mamelodi Sundowns v Maritzburg United (Lucas Moripe Stadium, 6pm); Bidvest Wits v Orlando Pirates (Moses Mabhida Stadium, 8.15pm)
NgeSonto: Cape Town City FC v Lamontville Golden Arrows (Cape Town Stadium, 3pm); Baroka FC v Highlands Park (Peter Mokaba Stadium, 3pm);
NgoLwesibili: AmaZulu FC v Kaizer Chiefs (King Zwelithini Stadium, 3pm)