Akusho lutho kimina ukuhlula uMosimane: Tembo
AKUSHO lutho ukubhaxabula “uthisha” wakhe kumqeqeshi weSuperSport United, uKaitano Tembo, ogcizelela eyokuzehlisa kubadlali bakhe.
ISuperSport ihlule iMamelodi Sundowns ngo 3-1 uma sekuhlanganiswe imiphumela yemilenze yomibili kowandulela owamanqamu weMTN8. Kowomlenze wokuqala la maqembu adlale ngokulingana ngo 1-1 kwathi ngoLwesithathu ebusuku Amatsatsantsa a Pitori awina ngo 2-0 wamagoli kaTebogo Mokoena noJamie Webber, eLucas Moripe Stadium, e-Atteridgeville.
ISuperSport ibiqala ukuhlula iSundowns emidlalweni ewu-17.
UTembo, oqeqeshwe nguPitso Mosimane kwiSuperSport eminyakeni edlule waphinda wamcathulisa enza izifundo zokuqeqesha, uthe akukho okutheni ngokuhlula lo mqeqeshi.
“Nginomlando noPitso. Ungumuntu engimhloniphayo futhi engazana kakhulu naye. Uyalithanda ibhola nomsebenzi wakhe. Kumnandi ukuwina ikakhulukazi ngoba iSundowns kade izenzela kithina kule minyaka edlule. Okwethu bekuwukuzama ukuguqula leso simo, ikakhulukazi ngoba lona wumdlalo wabakhaya lapha ePitoli. Ngijabule kodwa futhi akusho lutho kimina (ukuhlula uPitso). Mhlawumbe eqenjini kuyinto enkulu ngoba ungumqeqeshi osezuze okuningi. Mina lena yisizini yami yesibili ngingumqeqeshi. Angikawini lutho. Ngakho akusho lutho kimina,” kusho uTembo.
Kowamanqamu weMTN8 e-Orlando Stadium ngoOkthoba 5, iSuperSport izobhekana neHighlands Park efike kulesi sigaba okokuqala emuva kokuhlula iPolokwane City. Kuzobe kungokwesithathu Amatsatsantsa efinyelela kowamanqamu weMTN8 iminyaka ilandelana. Ayiwina ngo-2017, ahlulwa yiCape Town City kowamanqamu nyakenye.
“Sijabule ngokufinyelela kowamanqamu. Okubalulekile kithina ukuzithoba ngoba asikayiwini indebe. Sizodlala neqembu elinzima iHighlands Park,” kusho uTembo.