I-Afrika ibukise ngemoto yayo
INKAMPANI yokuqala yezimoto yase-Afrika iMureza ibonakale okokuqala embukisweni i-Automechanika Johannesburg eNasrec kusuka ngoLwesithathu. Lo mbukiso uyozwe uvalwe kusasa. IMureza inesivumelwano sokusebenzisana neSAIPA Group yase-Iran ngokuthi banikezane ezinye izinsimbi kodwa inhloso yeMureza ukuthi yakhe ngokuphelele izimoto zayo kuleli zwekazi.
Imoto yokuqala iPrim8 (ebizwa ngokuthi yiPrimate) iyi-crossover eyakhiwe e-Automotive Supplier Park eRosslyn, ePitoli.
Izobuye yenziwe naseWillowvale Assembly Plant eZimbabwe, kanjalo basembonini endala yakwaHyundai eBotswana. Abatshali zimali kuleli bhizinisi ngabase-United Arab Emirates.
Le moto inenjini engu-1.5 litres kaphethroli enamandla angu-87kW. Amandla iwathumela emasondweni angaphambili ngo-gearbox oyi 5-speed manual noma iCVT. Le nkampani ithe inhloso yayo ukuthi imoto enakho konke ibize phakathi kukaR180 000 noR200 000.
Izinto efika nazo zihlanganisa i-keyless entry, 7-inch touchscreen, Bluetooth, satnav, reversing camera, cruise control, parking sensors, audio system, air conditioning, poweradjustable driver’s seat, four airbags, electronic stability control, ABS brakes ne-tyre pressure monitoring.
Omunye wabasunguli bayo, uTatenda Mungofa, uthe kunesikhala phakathi kwezimoto ezintsha nezingamasekeni emazweni ase-Afrika kanti inhloso yabo ukusivala ngemoto entsha engabizi ngaphezu kwezimoto ezilandwa kwamanye amazwe.
“Sizokhuluma nabantu abadayisa izimoto ezingamasekeni abazalinda kwamanye amazwe futhi sizobasiza ukuthi babe nezindawo zokusevisa lapho sibona khona ukuthi kungasebenza noma sizoqasha izindawo zokusevisa ezizimele emazweni ahlukene ase-Afrika esihlose ukuthi siqale kuwo nenkampani yethu entsha,” kusho uMungofa.
Uthe lapha eNingizimu Afrika uthe babheke ukudayisa izimoto zabo eziningi emagaraji adayisa izimoto ezingamasekeni kunokuqala amagaraji abo amasha.
“Nokudayisa nge-internet kuzobaluleka kakhulu kithi futhi,” kusho yena.
Uthe iNingizimu Afrika ibonakala njengesizinda sebhizinisi lezimoto e-Afrika futhi kungalesi sizathu beyisebenzisa njengekomkhulu labo futhi babe nemboni yokuqala khona.
“Sibheke ukuthi sibambisane nezinkampani ezincane zamaphathi ezingakakwazi ukumelana nezidingo ezinkulu futhi ibhizinisi lethu lizosiza ukukhuzikhulisa. Sibheke futhi ukubambisana nosomabhizinisi bendawo ukuthi sisebenzisane nabo.”
IMureza Auto Company ihlose ukuthi yakhe iveni, i-sedan kanjalo neSUV encane.