I-Etios ingenye yezimoto ezibiza kancane
ABANTU baseNingizimu Afrika bayazifela ngezimoto ezincane. Kodwa ingabe iyiphi edayiseka ngemali engcono?
NgokukaDarryl Jacobson ongumphathi weTrue Price, imoto ehamba phambili yiToyota Etios.
Ithimba leTrue Price lihambela izindawo lapho kudayiswa khona izimoto esidlangalaleni ezisuke zidliwe ngamabhange, ukuqoqa ulwazi ngokuthi izimoto zidayisa ngamalini.
Uthe ngokusebenzisa ulwazi abalutholayo i-Etios iphume phambili.
“Ithole u-71.89% (wemali osuke uyithenge ngayo egaraji) nokuyenza ibe phambili ezimbangini zayo,” kusho uJacobson.
Nazi ezinye izimoto eziyisithupha: 1. Toyota Etios (71.89%) I-Etios ayibizi futhi ithembekile. Kuhlale kunabantu abaningi abayifunayo uma idayisa.
Amagaraji ayazi ukuthi kuzoba lula ukuyidayisa futhi abantu abayithengela imindeni yabo bayazi ukuthi bangayethemba. 2. Volkswagen Polo (70.55%) IPolo ingenye yezimoto eziyimpumelelo njengoba kudayise angaphezulu kuka-14 million emhlabeni jikelele. Ikhiqizwa e-Uitenhage lapho kwakhiwe khona iPolo entsha ka-200 000 kuule nyanga. UJacobson uthe iPolo yinhle futhi indlela ehamba ngayo intofontofo futhi ivulekile. 3. Volkswagen Polo Vivo (69.79%) Iyimoto encane edayisa kakhulu eNingizimu Afrika. Ngo-Agasti kwethulwe entsha ebizwa ngePolo Vivo Sound Edition. “Inentengo ehehayo, ifika nezinto eziningi futhi ifika nesigxivizo sakwaVolkswagen sokuthi iseqophelweni.” 4. Hyundai Grand i10 (67.52%) Ithuthukiswe ngoFebhuwari wonyaka odlule futhi kwengezwa nenenjini engu-1.0 litre.
“Idumile uma idayiswa esidlangalaleni. Ithandwa abathengi ayikhethi minyaka.” 5. Mazda2 (66.78%) Ithuthukiswe ngo-2017 lapho iMazda SA yethula khona iMazda2 Individual Plus 1.5 Auto nokwenza izinhlobo ezibe yisikhombisa. NgokokuaJacobson yiyona enhle okuzedlula zonke kulezi.
“Ukudayisa kwayo kusizwa nawubuhle bayo. Ngicabanga ukuthi iyaheha futhi abathengi bayavuma.” 6. Ford Fiesta (65.98%) UJacobson uthe idume kakhulu kubathengi abasebancane.