IPanAmericana iheha ngokuningi
INTO yokuqala evele ifike ekhanda uma ubona ibhasi yindlela ongayithatha ngalo. Phela amabhasi enza ukuhamba kube lula ngoba alayisha abagibeli abaningi futhi bahlale ngokukhululeka.
Kube yinto efanayo ngihamba ngeCaravelle PanAmericana ngoba bekuba lula kubantu ukuthi “awuthi ngishiye imoto yami ngingene kuwe”.
IPanAmericana ngeke uyinake kangako uma uyibuka ngaphandle, ikakhulukazi uma ukude.
Yinhle yona kodwa ungathi yiCaravelle ejwayelekile ngaphandle kwezinto ezimbalwa eziyenza ihluke.
Iqoshwe igama layo ngemuva nasezinhlangothini kanjalo nebheji elibhalwe uPanAmericana ngasezicabheni ngaphambili kumaB pillars.
Inobhampa bangemuva nangaphambili abapendwe ngendlela ehlukile futhi elinamakhava okulivikela ngezansi kanjalo namarimu angu-17 inch.
Inamawindi athintiwe ngemuva, radiator grille egqize ngechrome okuyenza ibe yinhle.
Okunye okuhehayo ngaphambili ngamalambu ayo amakhulu futhi kwebesihamba ngayo ngamaLED headlamps anamaLED daytime running lights.
Ngaphakathi yilapho indaba enkulu ikhona. Ilayisha abagibeli abayisihlanu futhi izihlalo zangemuva ziyakwazi ukuphenduka zibuke ezingasekugcineni. Ino “gida s’bhekane” njengoba abanye beye besho njalo.
Inezihlalo zesikhumba futhi ukuze abangaphandle benganiboni, inamakhethini okwazi ukuwavula noma uwavale.
Bekungaba kuhle ukube izicabha zangemuva zivuleka futhi zivaleke ngogesi.
Okunye angisibonanga isibambo sokuvala ibhuthi nokwenza kube nzima uma uwumuntu omfishane.
Ngale kwalokho yinhle abagibeli bahlala kahle futhi kuze kube khona netafula olifaka uma uthanda elenza kube lula ukuthi udlele phakathi njengoba kunendawo yokubeka nezinkomishi eceleni.
Leli tafula liyakwazi ukuya phambili nasemuva futhi liphinde liphakame.
Njengoba kuyimoto yomndeni nje, ishoda ngezindawo zokushaja amaselula nge-USB kwazise ngigcine ngithole eyodwa ngaphambili kuphela.
Ngaphambili engikuthandayo yiDiscover Media Navigation system eyenza impilo ibe lula, ikakhulukazi uma unendlela ngoba uvele ufake indawo laphoo uya khona bese kuvela inkombandlela.
Okunye futhi ukuthi kunezindawo zokuphumuza izingalo zombili kumshayeli nakumgibeli nokwenza ungakhathali uma unohambo olude.
Okumnandi kakhulu ngayo wukuthi inenjini eyi-2.0 BiTDI enamandla angu-132 kW ne-torque engu-400 Nm. Isebenzisa ugearbox oyi-7 speed DSG.
Iyabambelela nomzimba wayo omkhulu nokusizwa ukuthi idonsa ngawo womane amasondo njengoba iyi-4MOTION.
Noma uyifaka obhuqwini ayixakeki. Ngo-100km ibiphuzama amalitha kadizili angu-9.9 kanti inethangi elikhulu elingu-80 litres.
Ukusuka ku-0 iye ku-100km/h kuyithatha imizuzwana engu-12.1 kanti ijubane elikhulu ngu188 km/h. Inani 2.0 BiTDI 132kW DSG 4MOTION
R962 800 Ifike ne-Automotion Maintenance Plan yeminyaka emihlanu noma u-60 000km, i-warranty yeminyaka emithathu noma u-120 000km kanjalo ne anti-corrosion warranty yeminyaka engu-12.
Kumele iye kwisevisi ngemuva kokuhamba u-15 000km.