Kuboshwe abathathu ngokufa komfundi
KUBOSHWE abathathu izolo ngokufa komfundi waseDr Made Primary eLovu obekuthiwa webe iselula.
Ababili babo – ofunda uGrade 8 ongumnikazi wefoni eyebiwe nofunda uGrade12 – bashaqwe ngamaphoyisa oyedwa esesikoleni omunye esekhaya.
Kuthiwa umnikazi weselula nabafundi abangomakhelwane bakhe bashaya umfundi waseDr Made Primary bemsola ngokweba iselula ngoLwesine.
Kuthiwa baqale basola omunye umfundi ongumfowabo woshonile bamthatha esikoleni baya naye ekhaya kwafike kwavela ukuthi iselula yakhe iyefana kodwa likhona ibhokisi eyathengwa ikulo, nesiliphu sikhona base bemnxephezela ngoR50 ngokumsola base bethi kodwa kusho ukuthi umfowabo owebe iselula. Kuthiwa umufi wafakwa ucwazi, washaywa, washiswa nezinyawo. Umthombo uthe umufi waphuthunyiswa esibhedlela eMshiyeni walaliswa khona kodwa kwagcina kumenele ngempelasonto. Usihlalo wesigungu sokuphathwa kwesikole, uMnuz Themba Mhlongo, uthe nakuba engeke aphawule kakhulu ngodaba lokuboshwa kwabafundi kodwa udaba labafundi abaphatha amaselula kulesi sikole luyinkinga. Uthe nyakenye babiza umhlangano bakhuluma nabazali ngalo kwase kuthathwa isinqumo sokuthi abafundi baphucwe amaselula abekwe, banikwe wona uma sekuvalwa isikole.
“Kwagqekezwa esikoleni antshontshwa amaselula. Abazali bafika sebezowafuna esigungwini sesikole ekubeni kade kuyibo abathathe isinqumo sokuthi athathwe. Emuva kwalokho kwathathwa isinqumo sokuthi singabe sisabephuca amaselula. Bayawaphatha bashuthane ngawo balalele izingoma bathathe nama-video kodwa akukho esingakwenza.
“Ukube abazali babambisana nathi ngokuphathwa kwamaselula esikoleni ngabe okwenzekile akwenzakanga,” kusho yena.
ULt Col Thulani Zwane, okhulumela amaphoyisa KwaZuluNatal, uthe kuboshwe abantu abathathu ngecala lokubulala umfundi izolo.
Uthe kulindeleke ukuthi bavele eNkantolo yeMantshi eMbumbulu maduze.