Bazoqashwa ngamaphoyisa abaka-matric kufa umfundi
BAZOBHALA izivivinyo zabo zika-matric begadwe ngamaphoyisa abafundi base-Eastwood Secondary ngaphandle kwaseMgungundlovu emuva kwesigameko sokubulawa komfundi, okuthiwa ugwazwe ngabanye afunda nabo.
Umfundi kaGrade 11, uHershall Fynn (18), ubulawe ngaphandle kwamagceke esikole ngoLwesibili ntambama.
Izolo uNgqongqoshe woMnyango wezeMfundo KwaZulu-Natal, uMnuz Kwazi Mshengu, ube nomhlangano nothisha nabazali bakulesi sikole.
UMshengu uthe bezwe ukuthi kunodlame lwabafundi oseluhlukanise phakathi nomphakathi ngokobuhlanga, amakhaladi nabamnyama.
Ekhuluma neSolezwe ukugxekile okwenzeke esikoleni, wathi ezokuphepha zizoqiniswa ukuze kugwenywe ukuthi isigameko singabuye senzeke.
“Namhlanje (izolo), sikumisile ukufunda nokufundisa kulesi sikole ngenxa yalesi sigameko sokubulawa komfundi. Abafundi baka-matric abebebhala iComputer Technology, bayiswe kwesinye isikole babhala khona. Emuva komhlangano esibe nawo nabazali sitholile ukuthi kunomdlalo owenziwa ngabafundi bakamatric obizwa nge-bombing lapho abafundi beshaya amawindi esikole, bashaye nabanye, bajikijele isikole ngamaqanda. Lezo zimo ziholela odlameni kubafundi. Sithole nokuthi kunenkinga yezidakamizwa kulesi sikole,” kusho uMshengu.
Uthe emuva kokubona isimo babe sebehlela ukuba kutshwalwe amaphoyisa azoqapha.
“Kusukela kusasa (namhlanje), ukufunda kuzobuyela esimeni esijwayelekile. Sinxuse ukuba kube khona amaphoyisa azogada, aqinisekise nokuthi kuphephile njengoba abafundi bebhala izivivinyo zika-matric. Kuzoza nabaluleka abafundi ngokomqondo,” kusho uMshengu.
Ungqongqoshe ukhuze ukuba umphakathi kube yiwona obhebhethekisa udlame ngokuphindisela.
“Okunye okwenze isimo saba muncu kakhulu, kusolwa ukuthi emuva kokubulawa kwalo mfundi, abomphakathi wasemakhaladini, babe sebeya ngasemakhaya abafundi abamnyama bazama ukuphindisela.
Kumanje kunabafundi abasesibhedlela emuva kokuhlaselwa. Siyakuvala-ke lokhu. Abantu abadedele amaphoyisa enze umsebenzi wawo,”kusho uMshengu.
Uthe bawuvakashelile nomndeni womfundi oshonile, ukuyodlulisa amazwi enduduzo.
Okhulumela amaphoyisa KwaZulu-Natal, uLt Col Thulani Zwane, uthe akekho oboshiwe ngecala lokubulala, uphenyo lusaqhubeka. Amahebezi okuthi kukhona abafundi abahlaselwe, uthe ngeke bakuqinisekise kuze kube bavula amacala labo abashayiwe. Unina woshonile, uNkk Natalie Fynn, uthe akakholwa futhi kumshaqile ukubulawa kwendodana yakhe ebinekusasa eliqhakazile, ithanda nokudlala ibhola lezinyawo.