UNinow ubhale inkondlo exolisa ngokudlwengula
UMDLWENGULI uNicholas Ninow, izolo eNkantolo eNkulu yasePitoli ufunde inkondlo, egcwele izinyembezi ayibhalele intombazane eneminyaka eyisikhombisa ayidlwengula.
UNinow, uxolise nakugogo wakhe, endodaneni yakhe, ezalwe esesejele.
Usole izidakamizwa i-crystal meth neCAT, ayekubhemile ngelanga lesigameko.
Uthe lezi zidakamizwa zamphendula umuntu ayengeyena.
“Umqondo wawungewona owomuntu ophile saka. Ukube ngangidakiwe, ngangingeke ngikwenze lokhu,” kusho uNinow.
UNinow ubefakaza ezincengela ukuba anikezwe isigwebo esingcono.
Uphinde wafunda incwadi ayibhalele umndeni wale ntombazanyana ayinukubeza endaweni yokudlela eDros eSilverton, ePitoli.
Uthe le ncwadi nenkondlo ufuna ukukhombisa ngako ukuthi uzisola kangakanani ngakwenza.
UMshushisi uNkk Dorah Ngobeni, uthe lokhu akwenzayo ingoba ezifunela ukuzwelwa uma esegwetshwa.
UNinow ephendula uthe: “Akunjalo, njengoba ngishilo nje ngiyabakweleta laba bantu. Ngizizwa kangcono uma ngixolisa ngengakwenza. Kuyinto okumele ngiyenze ukuxolisa.”
UNkk Ngobeni uthe akakholelwa yilokho ngoba ukube ubezisola ngempela ubengeke avume icala, akhulume lokhu okuphikisanayo okwashiwo intombazanyana ayidlwengula.
Ngokusho kukaNinow, lokhu wakwenziswa wutshwala nezidakamizwa. Uthe wayengakuhlelile akwenza.
“Ngangenza izinto ngizithathela phezulu, ngicabanga ukuthi ngangidiniwe ngabe sengenza amaphutha ngezinto engazenza kule ntombazanyana. Asikho isidingo sokuba abantu bangizonde, nami ngiyazizonda ngakho konke engakwenza,” kusho uNinow
Uthe ubeqhubeka ebhema izidakamizwa esejele ngoba izidakamizwa ziyatholakala ejele.
Uqhube wathi uqale ukusebenzisa izidakamizwa eneminyaka engu-13.
Uthe kunzima kakhulu ukuzixolela, nokucabanga nje ukuthi yena wenza into efana nalena.
Ubesho lokhu ekhala mi izinyembezi.