Kulahleka izigidi ngokucisha ugesi
ISAZI somnotho nezomthetho uSolwazi Bonke Dumisa sithi ukucinywa kukagesi kuzoba nomthelela omubi kwezomnotho.
UDumisa uthe ukucinywa kukagesi yikona okuholele ekutheni iNingizimu Afrika ilengele kwinzikamnotho kumakota amabili alo nyaka.
“Ukucinywa kukagesi kusho ukuphazamiseka kokusebenza kwezimboni ezihlukene. Lokhu kusho ukuthi imali isuke ingangeni ngalawo mahora okusuke kucinywe ngawo ugesi. Uma izinkampani zikhiqiza kancane kusho ukuncipha kwempahla eziyidayisayo nokuncipha kwemali engena emnothweni wethu.
Ukucinywa kukagesi yizindaba ezimbi ikakhulukazi kulo mnotho wethu ongakhuli ngendlela egculisayo,”
Esitatimendeni esithunyelwe abezindaba, ngabase-Eskom bathe ukucinywa kukagesi kudalwa wukufa kwemishini.
Bathe kunama-boiler tube avuzayo futhi kufe ibhande elihambisa amalahle esiteshini sikagesi iMedupi ngoMgqibelo okuholele ekutheni lesi siteshi sibe namalahle amancane.
Lokhu bathe kuholele ekutheni basebenzise amagenerator okusho ukuthi udizili wabo wehlile.
Baxolisile kubantu baseNingizimu Afrika bathi ukucinywa kukagesi ngokohlelo lwesigaba sesibili okuwukucinywa kukagesi ezindaweni ezimbili amahora amabili kanye kanye kubalulekile ukuze kuqinisekiswe ukuthi izwe alibi sebumnyameni isikhathi eside.
INingizimu Afrika yagcina ukucinyelwa ugesi ngoMashi emuva kwesishingishane esasihlasele eMozambique.
Okwamanje akucaci ukuthi ugesi uzocinywa kuze kube nini njengoba abakwa-Eskom bethi bebengalindele ukuthi kuzofa imishini yabo.
UNksz Natasha Mazzone okhulumela iDA kwezamabhizinisi kahulumeni uthe uphoxekile ukuthi i-Eskom icime ugesi ekubeni yayithembisile ukuthi ngeke ucinywe ngoSepthemba nango-Okthoba.
Uthe lokhu kuzowisa umnotho wezwe ngoba kulahleka uR1 billion ngosuku uma kucinywa ugesi eNingizimu Afrika.
“Uma singenawo ugesi kusho ukuthi izimboni azikhiqizi. Imali iyahamba ezweni ngoba ucwaningo luthi kulahleka uR1 billion njalo uma kucinywa ugesi. Sifuna i-Eskom ibe nozinzo kodwa akubukeki sengathi luzoba khona uma kusacinywa ugesi.”
UMnuz Stanford Mazhindu okhulumela inyunyana yabasebenzi i-UASA uthe ukucinywa kukagesi kubi emnothweni wezwe, kuzokwandisa isibalo sabantu abangasebenzi.
“Siyacela uMengameli Cyril Ramaphosa amemezele izinhlelo zokulungisa i-Eskom ukuze kuphele ukucinywa kukagesi.
Uma ugesi ucinywa izinsuku eziningi umnotho ngeke ukhule ngoba abaqashi bazonciphisa amahora asetshenzwa ngabantu. Abantu bangase bagoduke nemali encane njengoba kuza uDisemba uma ugesi ulokhu ucinywa njalo.” kusho uMazhindu.
Uma ufuna ukubheka ukuthi ugesi ucinywa nini ngakini ungavakashela i-website kaMasipala weTheku ucindezele le-link Loadshedding link: bit. ly/11KH4du
Abahlala kwezinye izindawo bangangena kwi-website yakwa-Eskom.