I-IFP isola i-ANC ngokucubuza ngokudla

I-IFP KwaZulu-Natal isola i-ANC ngokuthenga amavoti ngokwenza sengathi ifuqa intuthuko kubantu njengoba kulungiselelwa ukhetho lokuchibiyela oluzoba ku-ward 9, eMhlathuze ngoLwesithathu oluzayo.

Usihlalo we-IFP KwaZulu-Natal, uMnuz Thami Ntuli, uthe isenzo se-ANC asamukelekile futhi sikhombisa ukuthi ifuna amandla ngayo yonke indlela.

“Egameni lesiqubulo sosuku lomhlaba lokudla, uNgqongqoshe wezokuThuthukiswa koMphakathi esifundazweni uNkk Nonhlanhla Khoza ngoLwesihlanu uzohambisa izijumbane zokudla kubantu ku-ward 9, ngaphambi kwezinsuku ezine kuyiwe okhethweni lokuchibiyela,” kusho uNtuli.

Uthe i-ANC isiyayisaba i-IFP ngenxa yempumelelo yayo okhethweni lwakamuva yingakho isigwazela umphakathi ngokudla.

UNtuli uthe akusikho okokuqala ukuthi i-ANC isebenzise imali yabakhokhibentela ithenga amavoti uma kuzoba nokhetho.

Ngeledlule, uNgqongqoshe wezokuHlaliswa kwaBantu esifundazweni uNkk Peggy Nkonyeni kade ekhona ku-ward 9, eyonika umphakathi amatayitela ezindlu.

UNtuli uthe bazofaka isikhalo kwi-IEC ngalolu daba.

Unobhala we-ANC eMusa Daldla uMnuz Tholi Gwala, uthe i-IFP idlala ipolitiki eshibhile njengoba isola i-ANC ngokuthenga amavoti ngaphambi kokhetho lokuchibiyela oluzoba ngoLwesithathu.

UGwala uthe intuthuko ayilinde ukuthi kuze kudlule usuku lokhetho ngaphambi kokuthi ihanjiswe kubantu.

“UNgqongqoshe wezokuThuthukiswa koMphakathi esifundazweni uzoza ku-ward 9, ezonika abantu izijumbane zokudla ngaphansi kwesiqubulo sosuku lomhlaba lokudla, ngeke ungqongqoshe ayeke ukusiza abantu ngoba nakhu kuthiwa kuzoba khona ukhetho,” kusho uGwala.

Uthe i-IFP inengebhe njengoba seyenza izinsolo ezingabambeki.

UGwala uthe abangabazi ukuthi bazonqoba njengoba umphakathi uthi usafuna ukuholwa yibona.