Izinhlelo zokuvalwa kwamakhaza
IKOMITI lezempilo esiShayamthetho KwaZuluNatal lanelisekile ngamakhaza kahulumeni asePhoenix okungase kube yiwona asetshenziswayo uma kuvalwa akuMagwaza Maphalala (Gale Street) eThekwini okuthiwa awekho esimeni.
Usihlalo wekomiti lezempilo, uNkk Nomakiki Majola, uthe isakhiwo samakhaza asePhoenix siyahambisana nalokho okubalulwe emthethweni olawula ukuthi amakhaza kumele abe sendaweni enjani.
Uthe umthetho awuvumi ukuthi amakhaza abe sendaweni ehlala umphakathi okuyinto eyenzeka emgwaqweni uMagwaza Maphalala.
“Ngesikhathi amakhaza kahulumeni akhiwa kule ndawo kwakuseyindawo yezimboni manje isimo sesishintshile sekunamafulethi ahlala abantu nezitolo okuyinto engavumelekile eduze kwamakhaza. Phezu kwalokho ngaphakathi kusona isakhiwo kunenkinga umoya awungeni kahle okwenza ukuthi kube nephunga. EPhoenix isakhiwo sisanda kwakhiwa sihambisana nakho konke okudingekayo futhi kusona kungagcinwa izidumbu ezingu-500,” kuchaza uNkk Majola.
Uthe uyazi ukuthi abantu bazokhala ngokuthi ePhoenix kucezile kodwa okumele bakubhekisise wukuthi noma indawo ikude kodwa isidumbu sesihlobo sakho uzosithola sisesimeni esigculisayo.
“Siyazi ukuthi kuMagwaza Maphalala kunenkinga yabasebenzi abakhala ngezinto ezithile abathi uMnyango wezeMpilo awuzilungisile. Nangesikhathi sivakashile ngoLwesibili kunemindeni ebihleli ilinde izidumbu zamalungu ayo ebezingahlinziwe ngenxa yokuthi abasebenzi badonsa izinyawo. Asingenanga kulokho sizobuya sizolalela kahle izinkinga zabasebenzi okwamanje bekumele sibheke isimo samakhaza,” kusho uNkk Majola.
Uqhube wathi njengoba benelisekile ngebhilidi elisha uma sebehambise umbiko esiShayamthetho kuzoqala uhlelo lokukhuluma nomphakathi osebenzisa amakhaza.
“Okwamanje sibona ukuthi kumele kube nendlela yokuthi abantu bafinyelela kanjani ePhoenix. Mhlawumbe ibhilidi elidala lingasetshenziselwa ukuthi imindeni ikhombe izidumbu kodwa zingahlinzelwa khona. Kodwa konke lokho kusazocutshungulwa,” kusho yena.
Uthe ikomiti lisohambeni lwezinsuku ezintathu lokuhlola ukuthi ngabe izikhungo zezempilo ziyahambisana yini nemigomo elawula umshuwalense wezempilo, iNational Health Insurance (NHI) oluqale ngoLwesibili oluphela namhlanje.
Izolo uthe bebehambele esibhedlela Osindisweni bathola ukuthi lesi sibhedlela sikulungele ukuthi kuqale lolu hlelo ngoba sinamaphuzu angu72%.
“Akukho okuningi okungenziwa ngamabhilidi esibhedlela. Madala kodwa zikhona izincomo esizozenza ngezinye izindlela zokusebenza,” kusho yena.
UNobhala weNehawu KwaZulu-Natal, uMnuz Ayanda Zulu, uthe umnyango awukaze ubatshele lutho ngezinhlelo zokuvala amakhaza asenkabeni yedolobha bezwe sekukhulunya ngakho ezindabeni.
Uthe bazokwamukela lokhu uma sekushiwo ngokusemthethweni.