Uchitha eyezinkabi owonogada abaqapha umzila
INKAMPANI yabaqaphi esolwa ngokuqhwaga irenki yaseMnambithi ebangwa wososeshini ababili, isiphumele obala yacacisa ukuthi ayisebenzi nezinkabi futhi yayithunywe ukuba izogada osomatekisi ababehlukunyezwa, bephucwa umsebenzi.
Lokhu kuvezwe umnikazi weQomukufa Security Company, uMnuz Sipho Ngcobo, obezwakalisa ukungenami ngokungcoliswa kwegama labaqaphi bakhe nenkampani yakhe.
Uthe babegade erenki, bengathunyiwe iSizwe Taxi Association kodwa babethunywe ngosomatekisi baseKlipriver abazithole beshawa ngoMsombuluko ngozakwabo bayo, iKlipriver bebaphuca umsebenzi.
“Okokuqala, mina anginazo izinkabi kule nkampani yami. Kodwa nginabaqaphi abasezingeni elihloniphekile, abawaziyo umsebenzi wabo abawuhloniphayo umthetho waseNingizimu Afrika. NgoMsombuluko kushawe osomatekisi baseKlipriver, baphucwa umsebenzi ngozakwabo abanabo kusoseshini ngoba sebefake abanye abantu sebethi bona abahambe.
“Labo somatekisi ngabantu abadala okukade baba amalungu eKlipriver njengoba isibaxosha. Kuthe ngoLwesibili bacela ukuba sizobaqapha ngoba bezizwa bengaphephile okuyinto eyenze labo zakwabo baduba, bavala imigwaqo ngamatekisi,” kusho uNgcobo.
Uthe omunye wabaqaphi bakhe uboshwe ngoba kukhona lapho kungahambanga kahle khona ekubhalisweni kwakhe kwiPsira, okuyinto abayilungisayo.
Usihlalo weSizwe Taxi Association, uMnuz Mbongeni Mpungose uthe okukhulunywa nguNgcobo weQomukufa kuyiqiniso ngoba bona babembize beyiKlipriver njengoba ngokwamaphepha babhalise imizila yabo ngeKlipriver.
“Empeleni lolu daba luqale ngeminyaka yo-2000 lapho kwaba nokulwa kwezinhlangothi ezikuSizwe, okwakukhona ababehamba nabakwaGcaba kwaba khona nababehamba noThula Sithole okwabe kuyithi.
Ngenxa yalolo dlame obaba babaleka bayobhaca.
“Kuthe uma udlame seluphelile saba nenkinga yokubhalisa imizila yethu, sabe sesicela obaba baseKlipriver ngoba kwakuwusoseshini obunobaba abahloniphekile.
“Sacela ukubhalisa ngabo ukuze sithole izimvume zokusebenza emizileni ebangwayo manje okuyiQwaqwa, iTheku, uMgungundlovu, iDundee, iVryheid nowase-Escourt. IKlipriver yavuma sangena ngaphansi kwabo sabiza bona, sathola izimvume ezazibalelwa ku-38 ngaleso sikhathi. Kuthe uma obaba sebebuya ekubhaceni sacela ukuba imizila yethu ibuye ukuze sizimele njengeSizwe, okuyilapho okuqale khona olunye udweshu abeKlipriver bengasafuni nemizila yethu. Yikho begcine beya enkantolo yabavuna ngesizathu sokuthi vele izinto zethu sazibhala ngabo ngoba thina sasisenezinkinga. Kuthe ngoMsombuluko basishaya basikhipha erenki, okuthe ngoLwesibili sabuya nenkampani iQomukufa sicela izosigada ngoba singasaphephile. Njengoba besiyibiza siyicele siyiKlipriver ngokwezimvume zokusebenza ukuba isisize ngoba siyashawa siyaxoshwa. Le nto yokungaboni ngasolinye ngemizila sineKlipriver empeleni iqale ngo-2012 sesifuna basibuyisele imizila siyibhalise ngathi siwuSizwe,” kusho uMpungose.
UMnuz Mfanafuthi Ndawo weKlipriver, uthe abanabo osomatekisi abagadwa iQomukufa kodwa ababo baqashwa iBlack Watch.
“UNgcobo naye wayekhona erenki ngesikhathi sasivalelwe umsebenzi ngakho akakhulume iqiniso ayeke lokhu akushoyo. Uma labo somatekisi kwakungabethu, kungani babengasebenzisi inkampani yethu yonogada, okuyiBlack Watch.
“Uma inkampani yabaqaphi izogada irenki noma umsebenzi ixhumana nosihlalo ayisayinele inkontileka yokusebenza. Ngakho iQomukufa ayikhulume iqiniso ngoba kwiKlipriver asikaze sibasayinele lutho, ngakho asibazi ukuthi babeqaphe bani kodwa ibithunywe Isizwe izodla irenki yethu,’ kusho uNdawo.