Ngithandana nosanda kushonelwa ngumyeni
EZOTHANDO
UMBUZO: NGINGOWESILISA oneminyaka ewu-42 oshade nowesifazane ona-35, sineminyaka eyisikhombisa sishadile. Ngiqale ukuba nezinsolo zokuthi uyajola unkosikazi wami ezinyangeni ezimbalwa ezedlule.
Uma ngimqonda ngezinsolo zami, ungitshele ukuthi akamthandi umuntu anaye kodwa uthandane naye ngenxa yesizungu. Ukhala ngokuthi mina anginaso isikhathi sakhe futhi akazizwa ethandwa emshadweni wethu.?
Igama ligodliwe eThekwini Impendulo: Bekumele unkosikazi wakho akwazise uma ebona inkinga emshadweni wenu ukuze niyilungise. Ukuphuma kwakhe ayojola ngaphandle akulungisi lutho. Kubalulekile ukuthi umxolele unkosikazi wakho wayezisola ngakwenzile, ikakhulukazi uma wawusafuna ukuba emshadweni ngoba ngeke nikwazi ukuya phambili ungakamxoleli. Siyazi kuzothatha isikhathi ukuthi uphinde umethembe ngokuphelele kodwa kusengalungiseka. Uma ungazimisele ngokumxolela kungcono umshiye kusemanje ukuze ningahlukumezani ngokuhamba kwesikhathi.
Khumbula nokuthathela phezulu izikhalo zakhe ezimenze waphumela ngaphandle uzame ngayo yonke indlela ukulungisa ukuze azizwe ethandwa ngaso sonke isikhathi. Munike isikhathi sakhe njengonkosikazi ukuze azizwe ebalulekile empilweni yakho. Umbuzo: Ngingowesifazane osemcane osanda kuthola ukuthi uzithwele. Konke bekuhamba kahle phakathi kwami nesoka lami. Kodwa manje emva kokumtshela ngesisu ngibona sengathi usehambela kude. Angazi noma ingqondo yami yini edlala ngami. Ngenzenjani? Okhathazekile, eHillcrest Impendulo: Ingane ngeke ingene phakathi kwakho nomuntu okuthanda ngeqiniso. Uma ebonisa izimpawu zokuhlehla kusho ukuthi ubevele engaliboni ikusasa nawe. Nawe kuhle wazi ukuthi ukukhulelwa kuletha ushintsho kumuntu. Kusengenzeka ukuthi akukho okushintshile esokeni lakho. Ake nihlale phansi nibonisane ngalolu daba. Sinifisela okuhle. Umbuzo:
Ngingowesilisa osanda kuthandana nowesifazane owashonelwa ngumyeni eminyakeni emithathu edlule. Ngimthanda ngenhliziyo yami yonke kodwa yena akazimisele ukungiveza emndenini wakhe nabantwana bakhe. Ukhala ngokuthi bazothini abantu ngomfelokazi osejola. Ngicabanga ukuthi iminyaka emithathu miningi ukuzilela umyeni wakhe. Sekwanele manje, ngifuna ukumenza unkosikazi wami ungakapheli lo nyaka. Ngenzenjani?
Ozithobayo, eThekwini Impendulo: Kunezinto abantu abalindele ukuthi zenziwe ngumfelokazi. Ezinye zazo ezingenasidingo. Ngakho siyazwelana kakhulu nowesifazane ngoba naye akazi ukuthi isiphi isikhathi esifanele sokuthi aqhubeke nempilo yakhe. Kanti nomndeni womyeni wakhe unokwawo okulindele kuyena. Konke loku kwenza kubenzima ukuthi aqhubeke nempilo yakhe ngisho esethanda kangakanani.
Sazise isithandwa sakho ngokuzimisela kwakho ukusishada. Emva kokukhuluma naye usungacela ukuhlangana nomndeni wakhe ubazise ngenhloso enhle onayo. Umbuzo: Nginenkinga yomyeni ongishayela izinto engingazazi uma ephuzile. Uze afune ukungivumisa athi ngakhipha isisu into engingakaze ngiyenze. Sekuze kwaba yinto ejwayelekile ukuthi uma ephuzile ngilindele noma yini. Okhathezekile, eRedhill Impendulo: Ungaze uyijwayele impilo enje ngoba ngeke iphele kahle. Siningi kakhulu isibalo sabantu besifazane abadlula emhlabeni bebulawa izithandwa zabo. Into yokuhlukumeza iqala kancane kugcine sekuyinto oyijwayele.
Kusobala ukuthi umyeni wakho udinga usizo yena kuqala. Akekho umuntu ongaze akushayele into engekho, ngaphandle uma kungukuthi utshwala awuzwani nhlobo nabo. Kufuneka ahlukane nabo ngoba ngelinye ilanga uyolimala ufe imbala. Sithumele imibuzo yakho ku info@moandphindi.com Nisilandele ku Mo&Phindi ku Facebook no-Instagram