Sikhala ngothisha obulala izingane zethu
MHLELI: Singabazali baseUtrecht, sikhala ngothisha obulala ikusasa lezingane zethu eMalahleni Combined.
Lo thisha ufika sekudlule isikhathi uma ephumelele ukuba khona emsebenzini. Kuke kuphele isonto engekho emsebenzini, engabike lutho. Lo thisha uma sekubhalwa ukuhlola akezi nhlobo, uma sekufuneka amamaki ezingane afake amamaki asukela ekhanda.
Ukutholile lokho usekelathishanhloko esebheka umsebenzi wothisha. Indaba idluliselwe kuthishanhloko bavumelana ngokuthi ngoba kade akuqala lokhu, kukhulunywe naye aboniswe kube ngathi uyezwa, uyoza esikoleni izinsuku ezimbili aphinde alahleke futhi.
Ngo-2015 lo thisha uke wafaka incwadi yokwesula ngenxa yokwehlulwa wumsebenzi, kwagijima unina omncane wayovimba ukwesula kwakhe wathi uzomenzenjani uma engasasebenzi. Kusho ukuthi kungcono abulale izingane zethu kunokuba ayophumula abuye uma eseyeke ukudlala ngezingane zethu. Uphindile nonyaka walahleka nakubo bengamazi, watholwa ezihlalele nesithandwa sakhe ngezinsuku zomsebenzi. Kulo nyaka uphinde wafaka incwadi yokwesula emsebenzini, wagijima futhi unina ezocela ihoxiswe le ncwadi. Abaphathi besikole benqaba, bayidlulisela esekhethe.
Waphikelela khona futhi unina omncane wayohoxisa incwadi egquba yena lo thisha ukuthi akayoyihoxisa, uzomenzani yena uma engasasebenzi. Kepha akamkhiphi yena ekhaya athi akaye emsebenzini okukhombisa ukuthi abanendaba nezingane zethu bona bafuna imali kodwa yena engasebenzanga.
Okumangaze kakhulu, abaphathi badlulise wonke amacala alo thisha eMajuba District, ukuba bathathe isinqumo ngaye, kwafika omunye esikoleni ovela kulo leli hhovisi lakwaHR ezothi akaxolelwe lo thisha, ahoxiswe onke amacala.
Umphathi wesikole wathi usekhathele yilo thisha, abamthathe basebenze naye emahhovisi yena useyabonga “ubulala izingane zabantu”.
Sicela abaphathi bezemfundo bangenelele ngoba kade ayiqala le mikhuba lo thisha.
Emakilasini angena kuwo, njalo izingane aziwatholi amariphoti, kushoda amamaki ezifundo zakhe. Abazali bangena belandelana bezokhala ngalo thisha ngokulova, ukufika sekudlule isikhathi, ukufaka amamaki okungewona, ukungamaki izivivinyo zezingane uma kwenzekile waba khona.
Nathi lezi zindaba sizithola kalula ngoba omunye esisebenza naye uyilungu lesigungu sesikole. Ubufakazi bakho konke lokhu bukhona esikoleni kusekelathishanhloko nothishanhloko ngoba konke akwenzayo kubhalwa phansi. Sicela umnyango ungenele, ziyafa izingane zethu. Abazali abakhathazekile
EMALAHLENI