Bathole izinsizakusebenza abebezidinga
IZINSIZA kusebenza ezinikezwe uMasipala iHarry Gwala zizosiza ngokuthi kusebenzeke kalula nangokushesha.
Lokhu kushiwo isakhamuzi sakulo masipala, uNksz Nollen Mdladla, waseMorningside, obeyingxenye yomphakathi wakule ndawo obuzozibonela uNgqongqoshe wezokuBusa ngokuBambisana KwaZuluNatal, uMnuz Sipho Hlomuka ezonikeza umasipala izinsizakusebenza ezibiza uR13 million ngoLwesibili.
UHlomuka unikeze umasipala amaloli, ogandaganda, umshini ocosha udoti, ogandaganda bokugugula umgwaqo nezinye izinsiza.
UNksz Mdladla uthe bajabule kakhulu ngokuthi kulethwe lezi zinsizakusebenza ngoba udoti usuzoqoqwa ngokushesha kungalindwa isikhathi eside njengoba bekukade kwenzeka.
“Ngizophawula kakhulu ngodaba lwamaloli ngoba ngiyazi ukuthi abekhona kodwa engenele. Udoti ubuthi usuqoqiqwe, uhlale uyizindimbane ngoba amaloli mancane. Siyethemba ukuthi lawa alethiwe azokwenza ukuthi kusebenzeke kalula, nathi siwumphakathi singakhali ngokungaqoqwa kukadoti,” kusho yena.
UHlomuka uthe ukulethwa kwezinsizakusebenza kuyingxenye yohlelo lukahulumeni wesifundazwe olwaziwa ngoKhawuleza olusungulwe emuva kokuthi uhulumeni enze ucwaningo ebheka ukuthi yini omasipala abashoda ngayo kakhulu eyenza ukuthi bangakwazi ukuhambisa kahle izidingo zomphakathi.
Imeya yomkhandlu, uMnuz Zamo Nxumalo, ithe izinsiza kusebenza abazinikezwe uHlomuka zizobasiza ngokuthi balungise imigwaqo zibasize nasohlelweni lokuhanjiswa kwendle oluyinkinga kakhulu kubo bonke omasipala abangaphansi kwalo mkhandlu,” kusho yena.
Uthe bazophinde bonge nemali abebeyisebenzisela ukuqasha imishini ezinkampanini.