I-FNB nosizo kosomabhizinisi
ALIKHO ibhizinisi elincane okufanele liwe. Usho kanje uNkk Faye Mfikwe oyisikhulu esibhekele ezokukhangisa eFNB ngesikhathi ethula umkhiqizo omusha ohlomisa osomabhizinisi ngolwazi olubasiza ukukhulisa izinkampani zabo.
UNkk Mfikwe nozakwabo baseFNB bathule ngokusemthethweni i-App ebizwa ngeFundaba ehlose ukuqinisekisa ukuthi osomabhizinisi abancane baba nalo lonke ulwazi abaludingayo.
“Senze ucwaningo sathola ukuthi osomabhizinisi abancane abawi ngoba bengenayo imali abanye basuke beswele ulwazi oluzothuthukisa izinkampani zabo. Njengoba amabhizinisi amancane kuyiwona adala amathuba omsebenzi amaningi sibone ukuthi asithule iFundaba okuyi-App enolwazi oludingwa wosomabhizinisi. Bazothola amavideo akhuluma ngokukhulisa izinkampani nokuthi baluthola kanjani usizo lwezimali.”
UMnuz Mike Vacy-Lyle oyisikhulu esiphezulu seFNB Business, uthe bahambele amalokishi ahlukene benza ucwaningo bathola osomabhizinisi bemikhakha ehlukene kusukela kwababhakayo kuya kwabakhanda izimoto.
“Size neFundaba okuyiApp etholakala kwiBanking App yakwaFNB. Abantu bazothola ulwazi olunzulu kusukela kolokwenza uhlelo lwebhizinisi, ukukhulisa ibhizinisi nokuligcina lisebenza. Bazothola ama-video osomabhizinisi abahlukene asebedlule ezingqinambeni eziningi. Bazothola namapodcasts nemininingwane ebhaliwe. Kunama-module awu-12 abhekelela izigaba ezine zebhizinisi kusukela liqala, likhula, lisebenza nokuthi wenzenjani ukuthi ibhizinisi lakho lingawi,”
UMnuz Jesse Weinberg oyinhloko yeSME Segment kwaFNB Business, uthe ulwazi olukwiFundaba lutholakala ngezilimi ezinhlanu okuyisiZulu, isiXhosa, isiSuthu, isiNgisi nesiBhunu.
“Sicela abantu basebenzise iFundaba bese besitshela ukuthi ulwazi abalutholayo lushaya khona yini. Bekunzima ukutolika amatemu esiNgisi siwayise ezilimini zomdabu kodwa sitshale imali eningi sasebenzisana nezazi zolimi ukuze sinike abantu ulwazi oludingekayo. Ngesikhathi senza ucwaningo kwavela ukuthi osomabhizinisi badinga ulwazi lokukhulisa amabhizinisi abo, usizo lokungena ezimakethe bese kuba wusizo lwezimali. Abaningi badinga amakhono okusebenzisa imali abasuke sebexhaswe ngayo.”
UNkk Mfikwe uthe bazoqhubeka nokuza nezinhlelo ezithuthukisa osomabhizinisi abancane ngoba bayalwenza ucwaningo ngezidingo zosomabhizinisi basemakhaya nabasemalokishini.