Abantu bakuleli bakweleta uR1.9 trillion
UCWANINGO lweNational Credit Regulator luveza ukuthi abantu baseNingizimu Afrika bakweleta uR1.9 trillion ezikweletini ezehlukene yize umnotho wezwe ungakhuli kahle.
Lolu cwaningo lwekota yesibili yonyaka ephele ngoJuni, luveza ukuthi abantu bakweleta uR260 billion ngama-credit card, amakhadi asezitolo nama-personal loans.
Abakhokhela amabhondi bakweleta uR959 billion.
Luphinde lwaveza ukuthi abantu benza izikweletu ngisho beqeda ukuhola kwazise abanye banesikweletu salokho okubizwa ngepay day loan.
Kuvele ukuthi abantu bakweletelwa ngendlela engahlelekile yize abaningi behluleka wukukhokhela izikweletu zabo.
Kuthiwa izikweletu ezintsha zinyuke ngo-5% zaya kuR134 billion.
Isazi somnotho se-Efficient Group, uMnuz Dawie Roodt sithe impilo yabantu baseNingizimu Afrika inzima ngoba u-59% wabo awusebenzi futhi ulala ungadlile.
Uthe isimo singase sibe sibi kakhulu uma izinhlangano eziklelisa amazwe ngomnotho zibeka iNingizimu Afrika kwinzikamnotho.
Ukhale ngokuthi izinkampani zikahulumeni zinezikweletu eziningi, okusho ukuthi uma uhulumeni ezama ukuyoboleka imali ukhokhiswa inzalo eningi.
“Izindleko zezikweletu zikahulumeni zidluliselwa kubantu. Abantu banezikweletu zabo. Uthola ukuthi sekufanele bakhokhe intela ephezulu ukuze kusizakale uhulumeni nezinkampani zakhe,” kusho uRoodt.
UMnuz Mervyn Abrahams ongumgqugquzeli wePietermaritzburg Economic Justice and Dignity Project uthe abantu abaningi bathwele kanzima ngoba abakwazi ukuthenga ukudla okwanela imindeni yabo.
UMnuz Neil Roets, oyisikhulu esiphezulu seDebt Rescue udonse ngendlebe abantu baseNingizimu Afrika ukuthi bangalokothi badale izikweletu njengoba kuza iBlack Friday.
Uthe uma ungayibekanga imali yokukhithiza endalini yeBlack Friday kuyacaca ukuthi awunayo imali yokukhithiza kulo nyaka.
“Ucwaningo lwethu luveza ukuthi u-24.8% wabantu bathatha izikweletu ukuthi baphile nsuku zonke. Baye baboleke imali ukuze bathenge ukudla, ukuze babe nemali yokugibela nokuthi bakhokhe imali yesikole. U-43% wabantu uveze ukuthi u-50% womholo wabo uphelela ezikweletini. Kuyacaca ukuthi abantu bacwile ezikweletini. Siyacela bayeke ukukweleta ukudla ngoba wumkhuba omubi lona.”
Uthe baningi abantu abacela usizo lweDebt Rescue ngoba sebecwile ezikweletini ngoba bakweleta uR1.9 trillion bese uhulumeni abe nesikweletu sikaR2.2 trillion.
Ukhale ngokuthi abantu basalele ngezinyanga ezintathu ezikweletini zabo zama-credit cards namakhadi asezitolo.