USuthu luzogadla ngezinkakha ezidume kwiChiefs
OWADUMA kwiKaizer Chiefs, uMario “Mnyango Wase-mall” Booysen, kungenzeka adlale umdlalo wakhe wokuqala eqenjini lakhe elisha AmaZulu ngeSonto uma selidlala neMamelodi Sundowns kwiLast 16 yeTelkom Knockout (TKO).
Nakuba lesi sitobha singakasayini noSuthu kodwa inkulumo yomqeqeshi waleli qembu, uJozef Vukusic, ikhomba ngokusobala ukuthi sizosayina kungekudala.
UVukusic utshele izintatheli izolo ukuthi sekusele “izinto ezimbalwa” bese besayinisa lo mdlali, odle ngethambo, akholelwa ekutheni uzobasiza kakhulu emuva.
“Noma yikanjani uMario uzoba ngumdlali wethu. Namuhla ntambama (esho izolo) uzodlula kodokotela babhekisise izinto ezimbalwa. Ngikholelwa ekutheni liyothi lisongwa isonto uyobe esengumdlali waMaZulu ngokuphelele. Maningi amathuba okuthi uMario adlale ngempelasonto ngoba usesimeni esihle kakhulu ngokomzimba. Ngigculisekile ngengikubone kuyena,” usho kanje uVukusic izolo.
Akuyena yedwa uBooysen obezama inhlanhla kuMaZulu njengoba kukhona omunye umdlali obedlalela Amakhosi uTsepo Masilela naye ufuna ukugijimela Usuthu.
“UTsepo usenesikhathi eside agcina ukudlala ngakho udonsa kanzima okwesikhashana. Sizozinika noma amasonto amabili kuya kwamathathu ukumsiza ajwayele futhi ukudlala. Nokho ngingakuqinisekisa ukuthi uma konke kuhambe kahle naye uzosayina noma yikanjani. Bobabili uBooysen noMasilela bangabadlali abanesipiliyoni esibadingayo kungakho besifuna bajwayele indlela esenza ngayo Osuthwini,” kuqhuba uVukusic.
Kuzobaphatha kabi abalandeli boSuthu ukuthi isibabuli somdlali waleli qembu uTalent Chawapiwa uqede eselimele izolo ukuziqeqesha. Ngokusho kukaVukusic bazolinda odokotela ukusho ukuthi umonakalo ngabe ungakanani kulo mdlali obonakale esevukile selokhu kufike uVukusic.
Usuthu luzovakashela amaBrazilians eLucas Moripe Stadium, ePitoli, ngeSonto ngo-3 ntambama.