Ufuna okungaphezu kokubekisa kweye-Afcon
AKAFUNI ukugcina ngokuzibekisela indawo kwi-Africa Cup of Nations (Afcon) ka-2021 ezokuba seCameroon, umqeqeshi weBafana Bafana uMolefi Ntseki, kepha ufuna ukuwina iqoqo aqhathwe kulona neGhana, Sudan neSao Tome and Principe, aqede eqhulwini.
Ukubhuntsha kwemidlalo emibili (oweZambia noweMadagascar) obekufanele ibe ngeyokuqala kuNtseki, kuholele ekutheni oweMali abawunqobe ngo 2-1 kwiNelson Mandela Challenge, kube yiwona azibula ngawo.
Ukuqala kwakhe ngewini nokubazi ukusuka nokuhlala abadlali, kumbeka ethubeni elikahle lokufeza iphupho lakhe.
Ukuqhathwa kweBafana kuGroup C neGhana, Sudan neSao Tome and Principe, kwenza lo mqeqeshi akholwe wukuthi kukhona okukhulu angakwenza kuleli qoqo ngaphandle kokufaka iqembu lesizwe kwiAfcon eseCameroon maphakathi no-2021.
Njengoba iBafana isidlulile kowokuqala kaNtseki, sekubhekwe olandelayo neGhana ekuhambeni ngoNovemba 14 lapho kuyobe sekuqala khona ushikishi lokuziphendlela indawo kwi-Afcon elandelayo.
“Kufanele zishintshe izinto manje. Asiyeli kuleli qoqo ukuthi sibalwe namaqembu esizwe amabili azothola indawo kodwa siya nomqondo wokulidla iqoqo. Lesi sifiso sami sichaza ukuthi yonke imidlalo esizoyidlala kusukela manje kuze kube uNovemba ka-2020, sizobe sidlalela ukunqoba. Uma kukhona lapho sizolahla khona amaphuzu kuzosho ukuthi ngeke silidle leli qoqo. Lokhu yikhona engifisa sifike nakho eCameroon. Ngaphandle kokuthi sizofika kwi-Afcon sinesithunzi nendawo esikleliswe kuyona izobe isiphucuzeke kakhulu,” kusho uNtseki.
Akazange akhombise ukuthuka kangako ngendlela iBafana edlale ngayo yize namanje kusakhulunywa ngendlela ekhombise ukubumbana ngayo. “Umphumela weMali muhle kodwa okumnandi kakhulu yindlela esiwuthole ngayo. Sithole lo mphumela ngaphandle kokuguqula indlela ebesihlele ukudlala ngayo. Lokhu kungiqinisa idolo ngesifiso sami sokudla iqoqo,” kusho uNtseki. IBafana izobhekana neGhana ekuhambeni ngoNovemba 15. Kuzodlula izinsuku ezine bese uNtseki emukela iSudan e-Orlando Stadium. Kuzodlula izinyanga eziyisishiyagalolunye bese kuba yima kuphinda kubuya imidlalo yokuhlunga ngonyaka ozayo lapho iBafana izodlala khona kabili kulandelana, eduze neSao Tome ngoSepthemba, bese kuba ngoweGhana ekhaya ngo-Okthoba. Umdlalo wokusonga iqoqo uzoba ngoNovemba ka-2020 lapho iBafana izoya khona eSudan. Selulonke uhla lwemidlalo yeBafana yokuhlungela i-Afcon ka-2020 lumi kanje:
Ghana v South Africa (15 Novemba 2019)
South Africa v Sudan (19 Novemba 2019)
South Africa v Sao Tome ePrincipe (4 Septhemba 2020)
Sao Tome ePrincipe v South Africa (8 Septhemba 2020)
South Africa v Ghana (10 Okthoba 2020)
Sudan v South Africa (13 Novemba 2020)