UKaruru nengebhe ngeDowns kwiTKO
ISIKHWISHIKHWISHI saMaZulu FC esidabuka eZimbabwe, u-Ovidy Karuru, sisola ukuthi iKaizer Chiefs ibafake enkingeni ngokushaya iMamelodi Sundowns abazobhekana nayo emdlalweni weLast 16 kwiTelkom Knockout (TKO) ngeSonto ngo-3 ntambama.
UKaruru uthe ukushaywa kwamaBrazilians kabuhlungu ngo 4-2 emdlalweni wesihle kwiShell Helix Ultra Cup ngempelasonto eyedlule, kungahumusheka ngokuthi Abafana Ba Style bazofuna ukubhodlela Osuthwini.
“Bazobe befuna ukukhiphela isibhongo kithina ngoba bashaywe ngo 4-2 yiChiefs. Ngiyavuma ukuthi uPitso (Mosimane) wadlalisa abadlali abangajwayele ukudlala kodwa bakhona abenze kahle. Lokhu kwenza ukuthi singazi ukuthi ngabe uzodlalisa bani ashiye bani kulo mdlalo. Ngiyazi abantu bathi bekuyisicoco esingasho lutho iShell Helix Ultra Cup kodwa ngiyaphika mina. Isicoco nesicoco siyafana nje noma ngabe umdlalo wesihle noma ngabe ngonjani. Futhi-ke eqenjini elifana neSundowns zonke izicoco zibalulekile,” kusho uKaruru izolo.
Abafana Ba Style sebevele bakhala bayazithulisa njengoba sebeshwebe isicoco seMTN 8 abaphume kuyona kowandulela owamanqamu bekhishwa ngomkhaya iSuperSport United.
Nakuba uMosimane enezinkulumo zokuthi usegaqele izindebe “ezinkulu” kodwa isicoco seMTN 8 yisona kuphela angakaze asinqobe ebholeni lakuleli, okusho ukuthi unesilonda.
“Emdlalweni womkhumulajezi kungenzeka noma yini. Ngingakugcizelela ukuthi siwulungiselele umdlalo. Sifuna ukusebenzisa umdlalo ukubuyisa kahle ukuzethemba ngoba isimo esikusona kwi-log kasisihle neze. Ngakho sifuna ukusuka kule ndawo esikuyona, ukunqoba kwiSundowns kungasisiza kakhulu ekutheni sizethembe kakhulu,” kuqhuba uKaruru. IBaroka FC iyona evikela isicoco seTKO. Ishaye i-Orlando Pirates kowamanqamu sekukhahlelwa amaphenathi ngesizini edlule. Lokhu kwenza uKaruru woSuthu abe nokuzethemba ngaphambi kokubhekana nompetha be-Absa Premiership ngeSonto.
“Uma lesi sicoco sinqotshwe yiBaroka ngesizini edlule, yini ezosivimba thina ekutheni sisinqobe? Kufanele sizinikele nje kwaphela. Inhloso yethu ukunqobela abalandeli bethu isicoco, abaxhasi nabaphathi bethu. Ngaphandle nje kwalokho sifuna ukunqoba isicoco sisinqobele nesifundazwe iKwaZulu-Natal ngoba kusifanele isifundazwe ukuhlabana ngesicoco,” kuphetha uKaruru.