UMahlambi umincele ukungalimali
UMDLALI wasesiswini weMamelodi Sundowns, uPhakamani Mahlambi, uthandazela ukuthi angaphinde alimale ukuze angaphuthwa elinye ithuba lokuyodlala emqhudelwaneni omkhulu womhlaba.
UMahlambi usegejwe yimiqhudelwano emibili namaqembu esizwe ngenxa yokulimala. Wayibuka kwithelevishini esekhaya imidlalo yama-Olympic yaseBrazil ngo-2016 ngemuva kokulimala okwamhlalisa izinyanga eziyishumi.
Uthe eselumele lapho wabuyela efomini enhle eqenjini ayelidlalela iBidvest Wits, wagcina ebizelwe eqenjini lesizwe lika-Under 20 elidlale kwiNdebe yoMhlaba ebiseSouth Korea ngo-2017.
Nakhona lapho uMahlambi uhoxiswe sekubalwa izinsuku kuqale umqhudelwano ngemuva kokuthinteka umsipha ekhempini.
Kulokhu usemincele ukuthi kungabi khona okuzomphazamisa ukuthi ahambe neqembu lesizwe lika-Under 23 elizoya kodlala kwi-Under 23 Africa Cup of Nations ese-Egypt kusukela ngoNovemba 8 kuya kuNovemba 22.
Lo mqhudelwano ungowokuhlunga amazwe amathathu azoyomela i-Afrika kuma-Olympic eTokyo, eJapan, ngonyaka ozayo.
“Leli yithuba lami lokuthi ngiyodlala kodwa kumele sizibekisele indawo kuqala. Okwamanje ngithemba ukuthi ngeke ngilimale. Kumele siqale ngokusebenza e-Egypt ukuze siye kuma-Olympic. Ebholeni uyakwazi ukuthola ithuba lesibili, ngicabanga ukuthi leli elami lokuthi ngiye kodwa uma ngingalimali,” kusho uMahlambi.
Ukhulumela eyokugwema ukulimala nje, useke wangadlala kule sizini kwiSundowns ngenxa yokulimala.
Lo mdlali, ogabe ngejubane, uthe uma bephumelela ukuya kuma-Olympic lokhu kuzobavulela ithuba lokuzibonakalisa ezinhlolini zamaqembu aphesheya.
“Yithuba elihle lokukhombisa ngethalente lethu.”
Kwi-Afcon iNingizimu Afrika ifakwe kuGroup B neNigeria, Ivory Coast neZambia. UGroup A ubophele osokhaya i-Egypt, Mali, Cameroon neGhana.