USasman uzama ukuzinza kwiChiefs
IYAMUDLA eyokuhluleka kwabadlali baseKapa emaqenjini aseGauteng umdlali wasemuva weKaizer Chiefs, uYagan Sasman, obukeka esezifakile enhliziyweni yomqeqeshi u-Ernst Middendorp, eNaturena.
USasman (23) ujoyine Amakhosi ekuqaleni kwesizini ka-2019/2020 emuva kokuchithwa yi-Ajax Cape Town edlala kwiGladAfrica Championship. Lo mdlali oyibamba emuva kwesokunxele, kudingeke azibonakalise kwazise akekho ethimbeni labaqeqeshi obembizile. Kodwa ubekade ecelelwe yimenenja yakhe ukuthi azozama inhlanhla kwiChiefs.
Ngempelasonto edlule, ngesikhathi iChiefs ibhekene neMamelodi Sundowns koweHelix Shell Ultra Cup, uMiddendorp usale echazekile ngendlela uSasman adlale ngayo maphakathi emuva ngokubambisana noDaniel Cardoso.
Nokho uSasman luyamkhathaza ukhondolo lokuhluleka kwabadlali baseKapa ukuhlala isikhathi eside emaqenjini aseGauteng. Kubadlali baseKapa abasheshe baphindela ekhaya kukhona uTyron Arendse kwi-Orlando Pirates nakwiSundowns, Erwin Isaacs odlale kwiBidvest Wits nabanye. “Sengikuzwe kaningi ukuthi abadlali baseKapa abakwazi ukumelana neGoli. Ngicabanga ukuthi kuya nomdlali uqobo. Abantu abafani. “Ngiyayicabanga le nto sonke isikhathi uma ngidlala. Kufanele uhlale uzibonakalisa njalo. Ngibheka umdlalo ngamunye futhi kufanele ngikhule emdlalweni ngamunye,”kusho uSasman. “Baningi abadlali engixhumana nabo baseKapa abadlalile eGoli, okukhona kubona uMario Booysen noFranklin Cale. Bangifonela bengibongela ngesikhathi ngijoyina iChiefs. Ngiyakhuluma nabo, ngicele iziyalo zonke izinsuku uma nginenkinga. Ukudlalela iChiefs kudinga uqine ngokomqondo. Yibhola leli, kwesinye isikhathi kawubi nomdlalo oncomekayo kodwa kufanele uvuke uzithathe.” NgoMgqibelo ngo-3 ntambama, uSasman kulindeleke ukuthi adlale phambi kwezihlobo nabangani edlubhe imibala yeqembu okungelona elendawo, uma iChiefs isibhekene neCape Town City koweLast 16 yeTelkom Knockout eCape Town Stadium, eKapa. Ngesikhathi iChiefs ivakashele iThe Citizens koweAbsa Premiership emasontweni adlule, uSasman ubesebhentshini.
“Kuzoba wumdlalo onzima. Sishaya amagoli noma ngabe yisiphi isikhathi emdlalweni, esiwombeni sokuqala nesesibili.
Amathuba okushaya amagoli siwakha sonke isikhathi. Uma siwasebenzisa amathuba singashesha ukuqeda ngabo,” kusho uSasman. Imidlalo yeTelkom Knockout Last 16: Kusasa: Maritzburg United v Bidvest Wits (Harry Gwala Stadium, 8pm)
NgoMgqibelo: Lamontville Golden Arrows v Polokwane City (Sugar Ray Xulu Stadium, 3pm); Cape Town City FC - Kaizer Chiefs (Cape Town Stadium, 3pm); Orlando Pirates v Stellenbosch (Orlando Stadium, 6pm); SuperSport United v Baroka FC (Lucas Moripe Stadium, 8.15pm)
NgeSonto: Mamelodi Sundowns v AmaZulu FC (Lucas Moripe Stadium, 3pm); Highlands Park v Black Leopards (Makhulong Stadium, 3pm)
NgoLwesibili: Chippa United v Bloemfontein Celtic (Sisa Dukashe Stadium, 7.30pm)