Ugabe ngamava azowasebenzisa kwiRoyal Eagles
ISIKHULU esiphezulu kwiRoyal Eagles FC, uMorgan Mammila, sishaya phansi ngonyawo sithi zizojika izinto kuleli qembu elingayiqalanga kahle isizini kwiGladAfrica Championship.
Ngokusho kukaMammila emidlalweni, eyishumi yeligi i-Eagles izobe isibalwa namaqembu agila izimanga kwiChampionship.
UMammila, oke wasebenza kwiBaroka FC neChippa United, utshele leli phephandaba izolo ukuthi ugabe ngamava ahlukene ebholeni amenze wahlonishwa kuleli. Nakuba engaphumelelanga obala ngenkontileka ayisayinile ne-Eagles, uMammila uthe akazimisele ngokuhlala isikhathi esifushane kuleli qembu.
“Ngiyazi ukuthi kwenziwa njani ukuze iqembu linqobe isicoco seligi, noma linqobe isicoco. Ngikwenzile lokho ngisasebenza kwiBaroka.
“Engikuzele kwi-Eagles ukuthi ngiqinisekise ukuthi iqembu liphethwe ngendlela efanele ngoba ukunqoba umdlalo akuqali enkundleni kodwa kuqala ekuphathweni kweqembu, bese kwehlela kubadlali. Ngiyafunga ngiyagomela ukuthi emidlalweni eyishumi kusuka manje, abathandi bakanobhutshuzwayo kuleli bazobona i-Eagles eyehluke kakhulu,” usho kanje uMammila izolo.
Lesi sikhulu sineminyaka ewu-6 sisebenza ebholeni elikhokhelayo kuleli.
Sisuke neBaroka isadlala emazingeni aphansi, sakhuphukela nayo kwiNational First Division (NFD), saze sayishiya isidlala kwi-Absa Premiership ngemuva kokunqoba isicoco seTelkom Knockout (TKO).
Sihlale isikhashana kwiChippa kodwa njengokwejwayelekile umphathi weChilli Boys uSiviwe “Chippa” Mpengesi wenze adume ngazo, saphoqeleka ukuba sesule ngenxa “yobuhlathi”.
“Ngijabule ngengikubone kwi-Eagles selokhu ngifikile. Ngiyazi ukuthi ukuze iqembu linqobe imidlalo lidinga ukuzinikela kubo bonke abantu abathintekayo, nokuhleleka okuphindaphindiwe.
“Abantu babona iMamelodi Sundowns inqoba isicoco seligi ekubeni idlala kwiCAF Champions League, bayazibuza ukuthi yenza ngani. Impendulo ilula, bahlelekile, benza izinto kusenesikhathi. Ngicabanga ukuthi yilokho okushodayo lapha kwi-Eagles,” kulandisa uMammila.
Ufika nje uMammila kwi-Eagles ishiywe yimenenja uRichard Makhoba nomqeqeshi uMorena Ramoreboli.
“Nginayo yonke inhlobo yesithako sokuba iqembu liphumelele kwelikufisayo. Akuyona yonke into edinga imali kodwa ezinye izinto zidinga ubumbano nokuhloniphana kwaphela. Akukho nokukodwa engikubona kuzoba lula kodwa ngiyazi ukuthi kuyenzeka nxa nibambisene,” usho kanje
uMammila.
Imiphumela yeChampionship: Real Kings 1-2 Uthongathi FC; Royal Eagles 1-0 Mbombela United; Swallows FC 1-2 TS Galaxy
Imidlalo yeChampionship:
NgoMgqibelo ngo-3.30 ntambama: Swallows FC - Ajax Cape Town (Volkswagen Dobsonville Stadium); Pretoria University FC v Mbombela United (ABSA Tuks Stadium); Free State Stars - Cape Umoya United (Goble Park); Royal Eagles v Uthongathi FC (Chatsworth Stadium); Steenberg United v Tshakhuma Tsha Madzivhandila (Athlone Stadium);
NgeSonto: ngo-3.30 ntambama: TS Sporting v Jomo Cosmos (Kabokweni Stadium); TS Galaxy v JDR Stars (Kameelrivier Stadium); Richards Bay v Real Kings (Umhlathuze Sports Complex)