Ufakwe ngemizuzu yokugcina ‘uThe Rock’
KUZOBONAKALA eringini uThabiso “The Rock” Mchunu obese kunovalo lokuthi kuzophela unyaka engalwanga.
Leli phephandaba lithole ukuthi lo mshayisibhakela odabuka KwaXimba, eMkhambathini, ufakwe ngemizuzu yokugcina emqhudelwaneni ohlelwa yi-5th Element Promotions ozoba ngeSonto, eSun Arena Time Square, ePitoli.
Uzotholana phezulu noWillbeforce ”Black Mamba” Shihepo waseTanzania. Bazolwa empini yomhlaba yokungcweka ezoba yimizuliswano eyisishiyagalombili.
Kuthiwa uMchunu oqeqeshwa uShaun Smith, ulungiselelwa impi yebhande lomhlaba ezoba ngoDisemba, eRussia. Kuzocaca ngesonto elizayo ngemininingwane ephelele.
Kuvela le mpi nje, bese kunokukhathazeka ngalo mshayisibhakela.
Ugcine ukulwa ngoDisemba wanyakenye eshaya uThomas Oosthuizen kweyebhande lakuleli le-Cruiserweight nele ABU.
Le mpi bekuyimpindamshaye njengoba kweyokuqala u-Oosthuizen wayenqobile kubangwa yona i-ABU.
Impi kaMchunu ngeSonto izobhulela amazolo ekaNkululeko “Bulldog” Mhlongo waseZiqwaqweni, eShowe, ozobanga noWalter Dlamini ibhande lakuleli le-middleweight nele-WBA Africa Cruiserweight.
Kuthintwa uMchunu uziqinisekisile lezi zindaba.
“Njengoba usho nje ngeSonto ngizolwa noShihepo waseTanzania. Okwamanje ngeke ngande, kukhona impi yebhande lomhlaba engingase ngilwe kuyona ngasekupheleni konyaka,” kubeka uMchunu.
Lo mshayisibhakela okleliswe endaweni ka-14 ezilinganisweni zomhlaba zeWBC Cruiserweight, usanda kutshela Isolezwe ukuthi uhlalele ovalweni lokuphucwa amabhande akhe ngenxa yokuhlala isikhathi eside engawavikeli.
Sekungumlando ukuthi eminyakeni embalwa eyedlule ubengumshayisibhakela obengaconsi phansi kubaqhathi bomhlaba.
Ngo-2015 kwale kancane leli nxele lilwele ibhande le-WBC World. Lishaywe u-Ilunga Makabu waseDRC kweyokuhlunga eThekwini.
Ngenxa yokushaya isibhakela esihle, ngo-2016 usayiniswe inkampani yokuqhatha yaseMelika, iMain Events kaKathy Duva. Ngaphansi kwayo ushaye izingqwele zomhlaba ezinjengoEddie Chambers no-Gerett Wilson baseMelika, Olanrewaju Durodola waseNigeria ukusho ezimbalwa.
Ngonyaka ofanayo uphinde waphuthwa yibhande le-WBO Cruiserweight eshaywa u-Oleksandr Usky wase-Ukraine.
Ukwehlelwa uthando kophromotha kuqale ukugqama ngo-2017 ngemuva kokuhlulwa uConstantin Bejenaru waseMoldova kubangwa iWBC International.
UShihepo, ngoJulayi ushaywe u-Akani Phuzi wakuleli ngomngqimuzo womlalisa phansi kubangwa iWBA Pan African Cruiserweight.
Ubephuma esibhaxwini sika-Aleksei Papin waseRussia kubangwa i-IBF International.
Omunye umshayisibhakela waKwaZulu-Natal ozobonakala ezimpini ze-5th Element Promotions, yintokazi uThema Zuma waseDududu.
Uzolwa kweyokungcweka noSimangele Hadebe waKwaThemba, eSprings, eGoli kwiSuper Flyweight.