Umthelela wokuhlulwa kweZululand Warriors
YIZINKINGA zombango kwiSafa eThekwini ezibe nomthelela ekutheni iZululand Warriors kuze kube yimanje inganqobi nomdlalo owodwa.
Lokho kutshelwe Isolezwe uSimo Mkhize oqeqesha leli qembu, phambilini ebelaziwa ngeManzimtoti Academy ebizinze eThekwini.
Kumanje leli qembu, eselifudukele oLundi, lilele isibili uma kusukwa emsileni.
Selingenelwe amagoli awu-14, lashaya elilodwa emidlalweni ewu5.
Livule imidlalo yeligi ngesibhaxu sika 7-1 elisithole kwiSummerfield Dynamos nesika 4-3 elisinikwe yiKwaDabeka Sporting.
Komunye libambane ngo 0-0 neQwabe United kwathi kodlule ladlala ngendlela efanayo neNatal Rich Boys (NRB). NakwiNedbank Cup lakhishwa zisuka yiyo iNRB ngo 3-1.
Ngaphambi kokuthi lithengwe uMuntomuhle Khali wakhona oLundi, linyuselwe kwi-ABC Motsepe League ngemuva kokuhamba inqwaba yezigcawu zokuqulwa kwamacala nasezinkantolo.
Kumasizini amabili edlule emdlalweni wokukhipha iqembu elalizomela isifunda saseThekwini kweyokuhlunga yeSAB, leli qembu lashaya ngo 3-2 iMageba United.
Emuva komdlalo iMageba yafaka icala ikhala ngomphumela. Emuva kombango wesikhathi eside kwagcina kuyinkantolo eyayalela iSafa ukuthi inike leli qembu igunya lokudlala eyokuhlungela ukunyukela kwi-ABC Motsepe League.
Emidlalweni yokuhlunga yesifundazwe ebingoDisemba wanyakenye, ligcine lidle umhlanganiso kwase kuba ukunyuselwa kwalo esigabeni esingenhla.
UMkhize obecija iqembu lase-University of KwaZuluNatal (UKZN) kwiVarsity Cup, uthe lo mbango udale ukuthi abe namasonto amabili kuphela ukulungiselela imidlalo yeligi.
“Okunye okusishayile, asikwazanga ukusayinisa abadlali abanesipiliyoni, sidlala ngeningi labadlali abanamava eSAB League. Nokho ikhona inhlansi yethemba lokusuka endaweni esikuyo,” kubeka uMkhize.
Uthe umdlalo wabo odlule neNRB umcacisele ukuthi abafana bakhe sebeyasijwayela isitayela sakwiMotsepe. Uthe badinga iwini eyodwa bese kulunga izinto.
NgoMgqibelo, emdlalweni ozoqala u-3 ntambama, ePrince Mangosuthu Stadium, oLundi, iZululand izodlala neMuzi King Masters.
IMuzi esendaweni ka-13 nakuyo kubhimba izinto. Nokho ngeledlule ithole iwini yayo yokuqala ishaya i-Edendale Juventus ngo 2-0
Imidlalo ye-ABC Motsepe League eqala ngo-3 ngoMgqibelo:
KwaDabeka v Qwabe (KK Stadium); Rainham v Natal (Eastbury Ground); Summerfield v NRB (Chatsworth Stadium); Experience v Mvoti (Umkomaas Bisset Ground); Zululand v Muzi (Prince Mangosuthu); Durban FC v Movers (King Zwelithini Stadium); Juventus v Milford (FNB Wadley Stadium); Friends v Wanderers (SJ Smith Stadium).