UKolbe uxwayisa ngengozi iJapan engase ibe yiyo
ISILOMO samaBhokobhoko esingomunye wabadlali okukhulunywa ngabo kakhulu kwiNdebe yoMhlaba eseJapan, uCheslin Kolbe, sikholwa wukuthi kungaba elikhulu iphutha ukweya iqembu lesizwe elingosokhaya ngoba bebuswa okwenzeke ngaphambi kokuqala komqhudelwano.
AmaBhokobhoko adlale owobungani neJapan ngaphambi kweNdebe yoMhlaba awunqoba.
UKolbe, olokhu elikhulise njalo igama lakhe emhlabeni ngendlela adlala ngayo eshiya abaningi bekhexile, ubona ingozi kwiJapan ngoba iningi layo lidlala ngendlela yena ajwayele ukuyisebenzisa ukudida izitha.
AmaBhokobhoko azodudulana neCherry Blossoms ngeSonto ngo-12.15 emini eTokyo Stadium emdlalweni ozokhipha izwe elizodlulela kowandulela owamanqamu.
“Singcweke nabo ngaphambi kokuqala kweNdebe yoMhlaba. Lapho besingcweka! Manje umqhudelwano usukuvuthondaba. Ngaphandle kwabadlali abawu-15 esizobe sibhekene nabo, kunenye inqwaba okuzomele siyizibe ngoba inomthelela omkhulu kubadlali beJapan. Kunzima kabi ukuvimba umuntu omfushane uma egijima nebhola.
“Uma ucabanga yini mina engidla ngayo? Yikhona ukuphunyuka ngoba ngimfushane. Cabanga-ke sesibhekene noChelsin abaningi. Umdlalo uzoba nzima ngezindlela eziningi. Okukhulu kunakho konke wukuthi bonke abantu babona sizoziphuzela isobho, kanti yilokho kanye okungasiphoxa emhlabeni wonke,” kusho uKolbe.
UKolbe uqhubeke kokushiwo wozakwabo ngokuvuma ukuthi usephenduke umlandeli weJapan.
Badlala ngendlela okufanele umbhoxo udlalwe ngayo. Nokunqoba kweJapan kwi-Ireland (ebalwa namazwe akleliswe phambili emhlabeni nama-All Blacks) neScotland kufanele kube yisexwayiso, ngokubona kwkhe.
“Bayadonsana uma bephethe ibhola. Uma usukhathele bakuqeda ngesivinini. Ayisekho manje le nto yokuthi kumele ube yisidlakela ukuze ugqame embhoxweni. Isibonelo esihle yimina nobufushane bami. Ngidlale nabo abaningi babo kuma-Olympic abeseRio de Janeiro ngakho ngiyabazi.
“Kukhona noMatsushima (engidlale naye kwiCurrie Cup kanti ungowokuzalwa eNingizimu Afrika). Uyasazi iningi lethu.
“Yonke le mifakela ikhomba ngokusobala ukuthi ukunqoba kwethu nokuhlulwa kulo mdlalo kulele engqondweni. Ngiyabethemba nokho ozakwethu nethimba labaqeqeshi. Sesihambe ibanga elide kakhulu ukuthi sesingayidedela sesiyibuka ngamehlo,” kusho kanje uKolbe.
Isiyonke imidlalo yamaquarter final kule mpelasonto imi kanje: NgoMgqibelo: England v Australia (Oita Stadium, 9.15am); New Zealand v Ireland (Tokyo Stadium, 12.15pm). NgeSonto: Wales v France (Oita Stadium, 9.15am); Japan v South Africa (Tokyo Stadium, 12.15pm).