Sezitholelwe uxhaso izitshudeni ezikweletayo
IZITSHUDENI ezikweletayo zithole uxhaso lweNSFAS, zizokwazi ukubhalisa ngaphandle kwezinkinga.
Lokhu kushiwo uNgqongqoshe wezeMfundo ePhakeme, iSayensi nezobuChwepheshe, uDkt Blade Nzimande, esitatimendeni asithumele kwabezindaba izolo.
UNzimande uthe kunemali enguR1 billion ebekwe eceleni ukweseka izitshudeni.
“Ngonyaka odlule, lo R1 billion ubekwe eceleni uhulumeni ukuze kuzosekwa izitshudeni ezingu-50 000 ezabhalisela ukufunda ngo-2018 ebezikweleta. Njengamanje uR450 million walesi sikweletu usukhokhiwe. Izitshudeni ezikweletayo ngo-2019 zivumelekile ukuba zibhalise ezikhungweni ezifunda kuzo uma zizosayina ifomu elishoyo ukuthi ziyazi ngesikweletu esikhungweni ezisuke ziphindela kuso. Imali isifakiwe yokukhokhela lesi sikweletu,” kusho uNzimande.
Kuthi izitshudeni eziqalayo ukufunda ezikhungweni zemfundo ephakeme kulo nyaka, ezingazange zibhalisele i-NSFAS kodwa ezisohlwini lwezingakwazi ukuthola uxhaso, zingakwazi ukubhalisa ngokuvumelana nesikhungo ngokuthi zisayine ifomu lokuthi ziyasazi isikweletu. Uma isicelo sazo sokuxhaswa yiNSFAS siphumelela, zobe seziqhubeka nokufunda ngaphandle kokuba nesikweletu.
“Zonke izitshudeni ezisezikhungweni noma ezikweletayo zinelungelo lokuba zithole imiphumela yazo, uma zifuna umsebenzi noma zifuna ukuqhubeka nokufunda,” kusho uNzimande.
Zonke izitshudeni ezithola iNSFAS ezikhungweni zemfundo ephakeme kuleli, ziyakwazi ukubhalisa ngaphandle kokukhokha imali yokubhalisa. UNzimande uzigxekile izigameko zodlame ezikhungweni zemfundo. Ukusho lokhu kulandela udlame olubheduke e-University of KwaZulu-Natal nase-Unisa kuleli sonto.
“Izitshudeni ezibhikishayo kumele ziqikelele ukuthi azigcini sezisabisa umphakathi nabanye abasebenzisa izikhungo okubalwa nabasebenzi.
Ukulinyazwa kwempahla kuwubugebengu futhi kumele zibhekane nomthetho uma zenza icala,” kusho uNzimande.
Unxuse amaphoyisa ukuba enze umsebenzi wawo, nabesikhungo ukuba baqinise ezokuphepha.
Uthe uzobheka kuzo zonke izikhungo ukuthi kuhamba kanjani futhi zonke izikhungo zizombikela ngokuphepha kwezitshudeni zazo.
Izolo okhulumela amaphoyisa KwaZuluNatal, uBrigadier Jay Naicker, uthe izitshudeni ezibalelwa ku-100 zibhikishile esikhungweni sase-Howard.
“Zizame ukushisa umlilo kodwa wacishwa. Izitshudeni zabe sezibaleka, amaphoyisa awazange abophe muntu njengoba zibalekile,” kusho uNaicker.