Sishubile isimo eToyota ngebhonasi
KUME nse ukusebenza efemini enkulukazi ekhiqiza izimoto iToyota, eProspecton, eThekwini, emuva kokuthi abasebenzi belaxaze amathuluzi befuna iQuality Bonus.
Isolezwe lithole ukuthi laba basebenzi batshelwa ngonyaka odlule ukuthi bakha izimoto eziyiquality okusho ukuthi abanawo amaphutha kwabakwenzayo futhi umsebenzi wabo muhle.
Kudala abasebenzi uma bekhiqize umsebenzi omuhle bebenikwa umhlomulo obizwa ngeQuality Bonus.
Kuthiwa kuthe uma kuphela unyaka bengayitholi iQuality Bonus abasebenzi badinwa kwathi kulo nyaka uma becelwa ukuthi basebenze amahora engeziwe ngoba kunomsebenzi omningi bathi abasebenzi bafuna imali yabo.
Isolezwe lithole ukuthi abasebenzi balaxaze amathuluzi ngoLwesithathu olwedlule kanti kuze kube namhlanje imishini imile eToyota.
Umqashi uye enkantolo wathola incwadi ephoqa abasebenzi ukuthi babuyele emsebenzini ngoMsombuluko kodwa kuthiwa abazange babuyele nokuholele ekutheni izolo kuxoshwe abasebenzi obekufanele basebenze ebusuku ngoLwesithathu.
Unobhala jikelele weNational Union of Metalworkers of South Africa (Numsa) KwaZulu-Natal, uMnuz Mbuso Ngubane, utshele Isolezwe ukuthi abasebenzi benza umsebenzi wabo ube nzima beyinyunyana ngoba uma beteleka ngaphandle kwemvume babeka umsebenzi wabo engcupheni.
Uthe abasebenzi babetsheliwe ukuthi bakhiqiza umsebenzi omuhle kodwa umqashi (Toyota) washo ukuthi ngeke akwazi ukubakhokhela iQuality Bonus ngoba abakhiqizanga umkhiqizo owanele.
“Umqashi uye enkantolo wathola incwadi evimbela isiteleka eyalela abasebenzi ukuthi ababuyele emsebenzini. Abasebenzi baqhubekile nesiteleka nokuthe izolo (ngoLwesithathu) kwaxoshwa abanye akade bezongena ebusuku. Sibambe umoya ukuthi kungaxoshwa abanye namuhla (izolo) ngoba bathi ngeke bangene bazwelana nozakwabo abaxoshiwe,” kusho uNgubane.
Uthe umqashi ucele abasebenzi ukuthi babuyele emsebenzini ngaphambi kokuthi axoxe nenyunyana, kolunye uhlangothi abasebenzi bathi ngeke babuyele emsebenzini umqashi engaxoxanga nenyunyana yabo.
“Kusasa (namhlanje) sizoya kwaToyota siyocela ukuxoxa nomqashi ngo-7 ekuseni ngoba kufanele silungiswe lesi simo. Sibi ngoba sifika esikhathini lapho izinga lokungasebenzi liphezulu ezweni, asifuni kulahleke eminye imisebenzi,” kusho uNgubane.
Umengameli wakwaToyota SA, uMnuz Andrew Kirby, uthe kunabantu abanezinhloso ezithize abasesitelekeni esingekho emthethweni abaphazamisa ukusebenza embonini yabo eProspecton.
Uthe laba bantu abayilaleli inkampani futhi abazilaleli nezinyunyana uma zibakhuza kodwa wudaba abazamayo ukululungisa.
Khonamanjalo batelekile nabasebenzi base-Ackermans Distribution Centre eHammarsdale njengoba befuna ukunyuselwa amaholo nokuthi kuqashwe ngokusemthethweni ozakwabo abangamatoho.
Isiteleka sabo siqale ngoLwesine olwedlule kanti kuze kube manje sisaqhubeka.