Selulwe ngenyanga isikhathi sezincomo

SELULELWE inyanga ezayo isikhathi sokuthi abantu bathule izincomo ngodaba lokuchitshiyelwa komthetho ozogunyaza ukuthi umhlaba uthathwe ngaphandle kwenxephezelo.

Izolo emuva kokuba ikomiti elibheke ukuchitshiyelwa kwalesi sigatshana libe nomhlangano kube sekumenyezelwa ukuthi isikhathi sizolulwa kube uFebhuwari 29. Phambilini kwakuthiwe kuzovalwa namhlanje ukwethulwa kwezincomo.

USihlalo wekomiti, uDkt Mathole Motshekga, uthe ikomiti livumelene ngokuthi kwelulwe isikhathi kuze kube yisekupheleni kwenyanga ezayo.

Uthe lokhu yingoba umthethosivivinywa ukhishwe ngesikhathi samaholidi ngakho abantu abakwazanga ukuletha izincomo zabo.

Uchaze nokuthi ikomiti alikanqumi ngezincomo elizitholile.

“Umnyango usavuliwe emaqenjini ezepolitiki ukuthi athule izincomo. Sizozibheka zonke izincomo noma kungathiwa zivela kuliphi iqembu lezepolitiki. Zonke izincomo ziyalingana.”

Uthe bazosebenzisa izinkundla zokuxhumana okubalwa kuzo iWhatsApp ukuze bakwazi ukuxhumana nentsha.

Kuzoba nezigcawu zomphakathi kuzona zonke izifundazwe kusuka ngoLwesihlanu kuze kube amaSonto.

IDA ithe asikho isidingo sokuba kuphazanyiswe umthethosisekelo.

I-DA ithe izothula ezayo izincomo eziphikisa ukuthi kwenziwe ushintsho kumthethosisekelo.

I-ACDP ePhalamende nayo ihambisana ne-DA.

I-ANC iyona ehamba phambili ekushumayeleni ivangeli lokuba umhlaba ubuyiswe ngaphandle kwesinxephezelelo kanjalo ne-EFF.

Abasafuna ukuthula izincomo bangabhalela kuMnuz V Ramaano, 3rd Floor, 90 Plein Street, Cape Town, 8000 noma nge-email ku:section25@ parliament.gov.za. Amakhophi omthethosivivinywa atholakala kuMnuz V Ramaano, enombolweni ethi: 021 403-3820 noma ethi: 083 709 8427 noma ku:www.parliament.gov.za