Umfufusi nomfufusi sicela bandla ayofufusela ngakubo
LE NTO yokufufusa kuzofanele ibhekwe ngamanye amehlo ngoba sekuyisikhathi eside sibekezelele abantu okuthiwa abanikwe ithuba ngoba basafufusa.
Okufike kube kubi ngokufufusa komuntu wukuthi ufufusa afufuse agcine engafufusanga, lokho osekusho ukuthi ubedlala ngemizwa nangemiqondo yenu enenza nikholwe wukuthi uzogcina eyinto ethile.
Ngokomthetho ukufufusa komuntu akusilona icala kodwa inkinga isekutheni umuntu ofufusayo ufufusela kubantu okufanele bamemukele.
Kuyahlukumeza ukubona umuntu efufusa aze aguge kulokhu kuthiwa uza kahle nokufufusa kwakhe, umuntu adlale ngamehlo ethu silokhu simbuka engabe sibuka ezinye izinto ezizoqhubela phambili impilo yethu.
MaSolezwe okaVolos uphakamisa ukuthi lo mdlalo wokufufusa ubekelwe imigomo ethile ngoba sekucacile ukuthi abantu abalawuleki.
Umuntu ozizwa efikelwa wumoya wokufufusa kungcono ahambe ayofufusa ngakubo ngoba akwehli kahle ukuthi kusuke umuntu azophoxa indawo yangakini athi ungumculi ofufusayo ebe ezazi ukuthi uyibhimbi lokuqala nelokugcina. Mina kuvele kuthi angihayize uma ngibona umculi osafufusa kamasikandi engingamazi ezofufusela ngakithi.
Okuyikhona okungenza ngicasuke wukuthi ngiyazi ukuthi uzothi angehlulwa yilokhu kufufusa kwakhe agcine esethuka izinhlamba eselubalubela udumo.
Kungenxa yalesi sizathu ngithi umfufusi nomfufusi akahambe ayofufusa ngakubo ukuze kungakhali muntu uma ukufufusa kwakhe sekuhlangabezana nezinkinga.
Le nto yokufufusa iyawuhlukumeza umoya ngoba kuke kusuke umuntu ongalazi ibhola oyinkomo isidalo sakhe kodwa athi ucela nimeseke ngoba usafufusa. OkaVolos usaphelelwa ngamahloni, uma ebona umuntu oyinkomo ethi uyafufusa ebholeni uvele athi: “Fire!Fire! Hamba moya omubi uyodlala nala madimoni akukhohlisayo”.
Ukube ukufufusa kuyinto ekhona ngabe sibona nangabathakathi kuthiwe banemithi engabulali ngoba basafufusa. Umthakathi uma esafufusa uyazifihla ukuze afunde kahle imithi, athi lapho evumbuka khona, kukhale abantu esenguhodoba womthakathi oqotha imbokodo nesesekelo.
MaSolezwe mina angisiyena umuntu ongawahloniphi amabhizinisi abantu kodwa angimfuni eduze kwami usomathenda osafufusa ngoba bonke banesifo esisodwa samanga.
Umuntu akusukele angcolise izindlebe zakho athi yena akenqeni ukukhipha isigidi samaRandi uma efuna umsebenzi, usho kanjalo nje kuyabonakala ukuthi kwayena ulambe esiswini.
Ngala mazwi amafushane okaVolos uthi akuyekwe ukumosha isikhathi ngezinto ezingekho okuthiwa zisafufusa.
Uma kuthiwa kunengxabano efufusayo kungcono siyilinde leyo ngxabano ibonakale kunokuthi kuthiwe kukhuzwa ingxabano engakaqali.
Uma kuthiwa kufufusa uqhekeko kungcono kulindwe lolo qhekeko luze lubonakale kunokuthi kuthiwe kuvinjwa uqhekeko okusolakala ukuthi luzoqhamuka.